O libro 'Aportacións á Simboloxía do Románico da Ulloa', escrito polo historiador Xosé Lois García e editado polo Instituto de Estudos Ulloáns (IEU), presentouse este sábado en Antas de Ulla.
O evento tivo lugar na Vella Igrexa de San Xoán, incluída no patrimonio románico da vila, e contou coa presenza da Deputación de Lugo.
En representación da institución provincial acudiu a deputada de Réxime Interior, Promoción do Territorio e Turismo, Pilar García Porto, que puxo en valor que Lugo, "en especial o sur", conta con "unha das maiores concentracións de románico rural de Europa".
Neste sentido, subliñou que publicacións coma esta "poñen en valor e dan a coñecer" este patrimonio que "é recoñecido, en parte, como Roteiro Transrománico grazas á institución provincial".
Segundo destacou a Deputación nunha nota de prensa, a institución adquiriu 500 exemplares deste libro que achega o románico da comarca da Ulloa a través de monumentos medievais que coexisten neste territorio.
Así, a publicación conta con 46 edificacións: 10 en Antas de Ulla, 16 en Monterroso e 18 en Palas de Rei, que a día de hoxe contan coa simboloxía románica.
Na presentación tamén participaron o director do IEU, Francisco Pardo; o párroco de San Xoán de Antas de Ulla, Javier Diéguez, e o propio autor, o historiador e escritor, Xosé Lois García.
