SOCIAL

GALERÍA | As novas árbores senlleiras que propón Adega no Día Internacional dos Bosques

Con motivo do Día Internacional dos Bosques, que se celebra cada 21 de marzo, Adega trasladou ao Comité das Árbores Senlleiras 12 propostas de nova inclusión para a protección doutras tantes árbores e formacións senlleiras do país. Trátase de "exemplares superlativos" que na maioría dos casos unen as súas "excepcionais características dendrométricas ou rareza" cun "destacado valor etnográfico e patrimonial". "Son monumentos vivos que cómpre coidar e preservar polo seu valor intrínseco, mais tamén como patrimonio para as xeracións vindeiras", salienta a asociación ecoloxista.

A proposta está integrada por un ameneiro (río Loira, Marín), unha araucaria (Pazo de Lourizán, Pontevedra), un bidueiro (lago Castiñeiras, Marín), a Carballeira de Brandeso (Arzúa), un carballo e un cerquiño (Cerracín, Friol e Santigoso, A Mezquita), tres castiñeiros (souto do Mola, A Mezquita, Pexeiros 1 e 2, Os Blancos), un eucalipto robusto (O Campo, Marín) e varios teixos (Vilarbacú, Quiroga e Noceda, Folgoso do Courel).

"Todos estes exemplares son verdadeiramente excepcionais", afirma Adega, que explica que destacan por aspectos como a súa idade —os máis de 500 anos do Castiñeiro do Mola—, o seu porte —caso do eucalipto robusto (Eucalyptus robusta Sm.) do Campo en Marín, ou o bidueiro do lago de Castiñeiras, tamén en Marín— ou tamén o teixo de Vilarbacú, o de maior circunferencia da Galiza.

Ameneiro do río Loira

Bidueiro do Lago Castiñeiras.

Carballeira do Pazo de Brandeso.

Carballo de Santigoso.

Castiñeiro de Pexeiros (2).

Castiñeiro de Pexeiros.

Teixo da Ermida de Vilarbacú.

Castiñeiro do Mola.

Teixos do Cemiterio de Noceda.

Carballo de Cerracín.

Araucaria de Lourizán.