O Intecmar (Instituto Tecnolóxico para o Control do Medio Mariño da Galiza), organismo dependente da Consellaría do Mar, ordenou o feche da actividade marisqueira na ría de Muros e Noia por niveis elevados da toxina paralizante dos moluscos (PSP, polas súas siglas en inglés Paralytic Shellfish Poisoning).
O paro no marisqueo afecta 140 embarcacións e un cento de mariscadoras, 30 de Muros e 70 de Noia, de onde tamén procedían as mostras de berberecho nas que se detectou a biotoxina.
Aínda que este feche cautelar é para todas as especies, a confraría de Muros enviou esta cuarta feira novas mostras de berberecho e navalla, agardando que polo menos este último bivalvo non estea afectado.
Para que o feche cautelar sexa levantado, os laboratorios teñen que emitir dous resultados negativos en biotoxinas.
Toxina paralizante dos moluscos
A PSP é un grupo de biotoxinas mariñas representadas principalmente pola saxitoxina e os seus derivados, as goniatoxinas ou goniautoxinas. Estas biotoxinas afectan o sistema nervioso provocando parálise muscular.
O período de incubación da intoxicación por PSP é duns 30 minutos despois da inxestión dos moluscos e o cadro clínico comeza con proído ou queimazón nos beizos, na lingua e na cara. Logo aparece entumecemento muscular en colo, brazos e pernas, con dificultade nos movementos e dificultade para falar. A intoxicación pode rematar na morte por parada cardiorrespiratoria, sendo máis sensíbeis as crianzas e as persoas maiores.
Xunto a PSP, na Galiza tamén son frecuentes a ASP (toxina amnésica) e a DSP (toxina diarreica).
