O comité de Xeal, firma que agrupa as antigas fábricas de Ferroatlántica de Cee, Dumbría e centrais hidroeléctricas dos ríos Xallas e Grande, acordou retomar esta cuarta feira ─ás 17.15 horas diante da fábrica de Brens (Cee)─ o calendario de mobilizacións semanais en resposta ás pretensións da dirección de deixar decaer o actual convenio de empresa e pasar a aplicar o convenio do metal da Coruña, de condicións salariais, laborais e sociais inferiores.
Segundo denuncian, a empresa está a dilatar indefinidamente as negociacións até provocar a caída do convenio, valéndose de que o actual texto non recolle a ultraactividade. Xeal bota así man dun dos aspectos máis lesivos da reforma laboral de 2012, que limitou a vixencia dos convenios, unha vez caducados, a tan só un ano para recortar dereitos económicos, laborais e sociais do persoal.
Diante desta nova "agresión" da empresa ao dereito á negociación colectiva, o comité prevé solicitar unha mediación para tentar desbloquear a situación e poder negociar un convenio propio que salvagarde os dereitos do conxunto do persoal.
Arranque dos fornos
A mobilización desta quinta feira, 9 de novembro, tamén servirá para reclamar a dirección un calendario para o rearranque dos fornos parados, que contemple datas concretas e previsións de produción de cara ao vindeiro ano. "É de todo ilóxico e irresponsábel continuar recortando a actividade produtiva das nosas fábricas cando está medrando a demanda de ferroaliaxes no mercado internacional e cando a propia Ferroglobe (provedor e cliente único das plantas) pediu que se puxeran en marcha", afirman.