O parou baixou en 15.300 persoas na Galiza no segundo trimestre do ano, o que supón 11,36% menos que entre xaneiro e marzo, mentres que nos últimos doce meses esta caída foi de 19.700 desempregados (-14,15%), situándose como a terceira autonomía do Estado español onde máis descendeu en termos absolutos, só por detrás de Canarias (-25.200) e Catalunya (-23.700). Así se desprende dos datos da Enquisa de Poboación Activa (EPA) publicada esta quinta feira polo INE, que recolle que o número total de parados galegos quedou en 119.700.
Deste modo, o país gañou 26.500 ocupados e ocupadas nos últimos tres meses, isto é, 2,41% máis, até os 1,13 millóns de persoas. En comparanza co segundo trimestre de 2022, Galiza fíxose con 25.000 persoas con traballo, 2,26% máis. A taxa de actividade queda no 53,22%, por baixo da media nacional, que ascende a 58,97%. Con todo, a taxa de paro galega é de 9,58%, por baixo da media estatal, que sobe a 11,6%.
Por sexos, na Galiza a taxa de paro entre os homes é de 8,91%, mentres que entre as mulleres este dato fica en 10,29%. E, por provincias, Lugo é a que rexistra menor taxa de paro, con 8,15%, mentres que en Ourense é de 9,05% e na Coruña, de 9,15%. En Pontevedra, pola súa parte, esta cifra sobe a 10,72%, a única que sobrepasa a media galega.
Máis de oito de cada dez contratos laborais vixentes na actualidade no país son indefinidos, concretamente 84,3% do total, mentres o restante 15,7% corresponde a contratacións de carácter temporal.
Datos estatais
No conxunto do Estado español o paro baixou en 365.300 persoas no segundo trimestre do ano, o que supón 11,7% menos que no trimestre anterior, ao tempo que se crearon 603.900 postos de traballo (+2,9%), levando o total de ocupados por vez primeira na historia a 21.056.700 persoas, sempre segundo estes datos da EPA.
O descenso do desemprego experimentado entre abril e xuño é o máis elevado nun segundo trimestre desde 1977 e sitúa o nivel de parados en 2.762.500 persoas, a menor cifra desde o terceiro trimestre de 2008. Deste modo, a taxa de paro reduciuse case 1,7 puntos no segundo trimestre, até 11,6%, o seu valor máis baixo desde o terceiro trimestre de 2008. Pola súa parte, a taxa de actividade repuntou catro décimas, até 59%, tras aumentar o número de activos en 238.600 persoas entre abril e xuño (+1%).
No último ano o paro reduciuse en 157.000 persoas (-5,4%) e creáronse 588.700 empregos (+2,9%), mentres que o volume de activos incrementouse en 431.700 persoas (+1,8%). Segundo o INE, o número de asalariados aumentou no segundo trimestre en 505.500 persoas(+2,9%), das que 410.100 tiñan contrato indefinido (+2,8%) e 95.400, contrato temporal (+3,2%).
