Centenares de traballadores do sector do metal de Lugo, un milleiro segundo os organizadores, percorreron este domingo as rúas da cidade amurallada para pedir que se aplique nas súas nóminas o incremento do IPC real xa que, en caso contrario, levarán a cabo unha folga o próximo 10 de maio.
Convocada por Comisións Obreiras, UXT e a CIG, a manifestación partiu ás 12 horas da casa sindical situada na Ronda da Muralla. A partir de aí, percorreron diferentes rúas da capital comarcal até chegar á praza de Santo Domingo.
"A xente respondeu ben porque leva cos salarios conxelados desde 2021, a pesar de que o IPC está desbocado"
Fontes sindicais consultadas pola axencia Europa Press mostraron a súa satisfacción ante a "boa acollida" que tivo a convocatoria, que superou "todas as expectativas". "A xente respondeu ben porque leva cos salarios conxelados desde 2021, a pesar de que o IPC está desbocado", censuraron.
Entre as súas solicitudes, piden á patronal que aplique nas súas nóminas unha suba correspondente ao IPC real e que se paguen os atrasos pendentes a respecto diso. Tal e como explicaron, na actualidade está a negociarse o convenio colectivo até 2025, pero aínda non se abonou o aumento correspondente a 2022.
Por todo iso, anunciaron a convocatoria dunha folga o 10 de maio "se non hai solución". Mais, a pesar diso, os sindicatos esperan reunirse coa patronal nos próximos días —xa solicitaron un encontro— para alcanzar un acordo e evitar o paro no sector.
"Esgotaremos todas as posibilidades e reunións antes de ir á folga", indicaron as mesmas fontes, engadindo que os traballadores non están dispostos a perder poder adquisitivo.
