A industria perde peso e avanza o sector extractivo

A produción industrial galega sufriu unha caída de 1,5% no ano 2022, o segundo maior retroceso entre as autonomías do Estado español, só por detrás de Castela e León (-3%), sinalan os datos publicados esta terza feira polo Instituto Nacional de Estatística (INE). Declínio industrial na Galiza Deste modo, a Galiza foi unha das únicas catro autonomías do Estado español nas que a produción industrial diminuíu durante o ano 2022, mentres que aumentou en 13. Os maiores incrementos déronse nas Balears (13,6%) e en Madrid (5,6%). De media rexistrouse un avance de 2,4% no conxunto do Estado. Así, a industria galega volve á taxa negativa no global dun exercicio despois do incremento de 8,3% que anotou en 2021. En 2020, ano de inicio da pandemia, a caída da produción industrial foi maior á recuperación de 2021, cunha mingua de 8,5%. Caída por subsectores A actividade da metalurxia, é dicir, a fabricación de produtos de ferro, aceiro e ferroaliaxes, foi o subsector industrial que obtivo unha peor evolución da súa produción na Galiza durante o ano 2022, cun descenso de 29%. Xeal abre a porta a que a Xunta recupere as concesións hidroeléctricas do Xallas Séguea a industria do papel, cunha baixada de 26,6% nos resultados do ano anterior. A terceira caída máis importante corresponde á fabricación de material e equipamento eléctrico, que minguou en 17,7%. Por detrás nesta clasificación de evolución negativa, tamén é relevante a taxa do fornecemento de enerxía eléctrica, gas, vapor e aire acondicionado, que caeu 10,7%, así como a da fabricación de material de transporte, que baixou 10,5%. O resto de minguas correspondéronse coa industria téxtil (-8,3%), a industria da alimentación (-5,6%), a fabricación de produtos de caucho e plásticos (-5,3%) e a fabricación de vehículos de motor, remolques e semirremolques (-1%). Por nivel de repercusión no conxunto da economía galega no ano 2022, destacan as caídas dos subsectores do fornecemento de enerxía eléctrica, gas, vapor e aire acondicionado, o da metalurxia e o da alimentación. O fornecemento de enerxía eléctrica, gas, vapor e aire acondicionado acumulou a peor influencia negativa sobre a economía da Galiza, cunha repercusión de -1,6%. A metalurxia, ademais de ter a maior baixada na taxa de produción industrial, tamén ten a segunda maior influencia económica negativa, de -1,4%. Pola súa parte, o subsector da alimentación, que non está entre as maiores caídas de produción, é o terceiro no que respecta á repercusión negativa na economía galega en 2022, cunha taxa de -0,9%. A industria extractiva, a que máis impulso colle Pola parte da evolución positiva, o subsector que máis avanzou no seu índice de produción durante o ano 2022 foi o das industrias extractivas, cun incremento de 43,3%. Séguea a confección de roupa de vestir, con 17,1%, e a fabricación de móbeis, con 14,7%. A Xunta autoriza a vertedura de augas residuais en San Finx Tamén por riba de 10% na evolución do índice de produción industrial están o subsector da fabricación de maquinaria e equipamento (11,8%) e o da industria química (11%). Ademais, a fabricación de produtos minerais non metálicos subiu 9,9%. A actividade extractiva aumentou 43,3% o índice de produción industrial no territorio galego no ano 2022 En termos de influencia positiva sobre o conxunto da economía galega en 2022, tan só un subsector industrial superou o limiar de 1%. Desta forma, a confección de roupa de vestir, tivo unha repercusión de 1,1%. Por destino económico dos bens na media do ano 2022, os bens de consumo -as mercadorías finais dun proceso de produción- presentaron un crecemento de 1,4%, cunha repercusión de 0,4%. Os bens de equipo -bens destinados a producir outros bens- rexistran unha taxa de 3,1%, cunha influencia económica positiva de 0,7%. Pola súa parte, os bens intermedios -os empregados na fabricación dun produto final- baixaron 5,1%, cunha repercusión negativa de 1,5%. Ademais, a produción de enerxía caeu 6% e influíu negativamente en 1,2% á taxa de variación do conxunto. Perda de peso industrial A Galiza "está perdendo peso industrial no ámbito estatal e da Unión Europea (UE), o que aumenta a fraxilidade e vulnerabilidade da nosa economía", explica a Nós Diario o economista Joám J. Romero Durán. "Os novos proxectos industriais céntranse no extractivismo e non na transformación da manufactura", prosegue. "A falta dun sistema financeiro público, o déficit de infraestruturas internas e a falta de conexión aos principais corredores de comunicacións por estrada ou ferroviarios non axudan a que as decisións de investimento produtivo no sector industrial se focalicen na Galiza", conclúe. A segunda autonomía con peor taxa Castela e León (-3%), a Galiza (-1,5%), Cantabria (-1,3%) e Asturias (-0,5%) foron as únicas catro autonomías do conxunto do Estado que obtiveron unha taxa media negativa do índice de produción industrial durante o ano 2022. Mentres tanto, a nivel estatal, esta taxa alcanzou de media un dato positivo de 2,4%. O maior ascenso foi nas Illes Balears (13,6%), por diante da Comunidade de Madrid (5,6%), Aragón (5,1%) e Castela-A Mancha (5%). Até 13 autonomías do Estado tiveron datos positivos.