O profesorado galego para contra a política educativa do PP: "Estamos fartos de recortes"

A resposta do profesorado á folga convocada esta terza feira superou as previsións de CIG, STEG e CSIF, sindicatos convocantes. Neste sentido, os voceiros das mesmas certificaron un seguimento desigual entre o profesorado de infantil e primaria e o do resto dos niveis educativos, cifrando o paro do profesorado de Secundaria, Bacharelato, FP, Escolas de Idiomas, Conservatorios e Escolas de Artes en perto de 70%, mentres que nos colexios de infantil e primaria ficou en arredor do 40%. Os responsábeis sindicais criticaron os criterios seguidos pola Xunta da Galiza para avaliar o seguimento da protesta, que o Goberno galego cifrou en 15,3% do profesorado. Nesta dirección, o secretario nacional da CIG-Ensino, Xesús Bermello, denunciou que o conselleiro de Educación, Román Rodríguez "deu instrucións a todas as direccións dos centros de que non desen ningún dato posterior ás 9.30 horas da mañá", momento en que "a maioría" dos ensinantes de Secundaria "non están". O termómetro do éxito da folga volveu ser, como en todas as protestas convocadas polas traballadoras e traballadores do ensino na última década, a manifestación nacional organizada polos sindicatos convocantes. Neste caso, a marcha decorrida polas rúas de Compostela, baixo unha intensa choiva, xuntou milleiros de persoas. A mobilización, segundo os organizadores, "duplicou en asistencia a convocada en decembro de 2019 por seis sindicatos e centrada na recuperación do horario lectivo". Os voceiros da CIG, STEG e CSIF cualificaron a manifestación de “clamor”. Nesta liña explicaron a alta asistencia á marcha como consecuencia de que "o profesorado está farto de recortes e está en contra do acordo asinado pola Xunta da Galiza e os sindicatos CCOO, ANPE e UXT polo que se renuncia a recuperar o horario lectivo que desde hai 14 anos lle foi roubado aos mestres e mestras e desde hai 12 ao profesorado do resto de ensinanzas". Profesorado do ensino público, en folga polos seus dereitos Recuperar o horario lectivo As centrais sindicais promotoras da folga aproveitaron o remate da manifestación para reclamar a recuperación dos horarios lectivos de 18 horas para ESO e Bacharelato e de 21 horas para infantil e primaria nun máximo de dous cursos. Nesta orientación, criticaron que o citado acordo "se limite a unha redución de 23 horas lectivas no canto de recuperar as 21 en infantil e primaria” e que non “se trate a recuperación do horario lectivo do profesorado de secundaria e outras ensinanzas”. Os representantes das centrais convocantes incidiron en que “a rebaixa a 23 horas lectivas en infantil e primaria non vai supor nin un só mestre ou mestra máis porque os catálogos dos centros están deseñados desde o ano 2007 para un máximo de 21 horas lectivas, polo que mesmo volver a este horario tampouco tería incidencia a nivel de incremento do persoal”. En declaracións aos medios, Bermello asegurou que a Consellaría de Educación “é a principal responsábel da división do profesorado e tamén da división sindical que se produciu durante as negociacións, que se fecharon en falso cun acordo que renuncia, de facto, a recuperar o horario lectivo e que nos deixa á cola do Estado, xunto con Madrid, no mantemento de 25 horas [lectivas] en primaria e infantil e as 20 no resto de etapas”. Bermello amosouse moi crítico co acordo sobre ratios pactado entre a Xunta da Galiza, CCOO, ANPE e UXT. A este respecto, afirmou que “o vindeiro curso só comezará a aplicarse a rebaixa de 25 a 20 por aula en 4º de infantil, é dicir, ningún alumno que estea nestes momentos no sistema educativo se beneficiará desta baixada, que tardará nove anos en culminarse en primaria e para a que non hai data de aplicación na ESO e Bacharelato”. Suso Bermello (CIG-Ensino): "O que agobia os docentes é o exceso de alumnado por aula, de horas e burocracia" Unha das demandas chave da CIG, STEG e CSIF para esta folga foi a redución das ratios en todos os niveis educativos comezando no curso 2024/2025. Nesta dirección, denunciaron que o acordo recolle que “a aplicación da redución das ratios en primaria se estende a nove anos, non se pode afirmar cando comezará e rematará a redución de ratios na ESO ou o Bacharelato e non se fale das demais ensinanza”. Neste punto, poñen de manifesto que o pacto asinado "non dá resposta ás demandas laborais do persoal docente”. Acordo salarial O acordo retributivo asociado ao pacto asinado entre o Goberno galego, CCOO, ANPE e UXT foi outro dos motivos da folga. Nesta perspectiva, os sindicatos promotores da protesta apostaron por “un reparto lineal da masa salarial comprometida pola Consellaría entre todo o profesorado”. Así, CIG, STEG e CSIF consideran que “o apartado retributivo do acordo agrava aínda máis a división do profesorado”. Ao tempo, lembran que “é a primeira vez desde 1990 no que un acordo incorpora subas que non teñen un carácter equitativo e lineal, provocando que a inmensa maioría do profesorado vaia ter unha suba inferior á que podería conseguir cun reparto por igual entre todas e todos”. Os responsábeis sindicais sinalaron, ao remate da manifestación desta terza feira en Compostela, que “coma sempre é a Administración a que introduce o tema dos cartos na negociación cando os tres piares sobre os que debía pivotar eran exclusivamente as ratios, o horario e a burocracia”. Nesta liña, aseveraron que “esta é a maneira de querer comprarnos, pero está claro, e así o demostra o feito de que hoxe sexamos moitas máis voces as que estamos aquí que nas últimas convocatorias, que nin o profesorado nin o ensino público se venden”. Bermello destacou que “quen máis verá incrementado o seu salario serán membros da inspección, dos equipos directivos e das asesorías da Consellaría, así como 15% de todo o profesorado galego, que é o que ten cinco sexenios de antigüidade”. A Xunta rebaixa a asistencia á folga O conselleiro de Educación, Román Rodríguez, cifrou a participación do profesorado na folga desta terza en 15,3%. Neste sentido, asegurou que “15% tampouco é unha porcentaxe tremendamente excesiva" e "non xera problemas na organización dos centros". Rodríguez dedicou a xornada a tratar de ofrecer “normalidade” na actividade dos centros de ensino e destacou que “funcionaron con gran normalidade" malia que "obviamente, sempre hai algunha molestia". Nesta liña, puxo o foco no acordo “histórico” asinado polo seu departamento con ANPE, CCOO e UXT.