O albergue de Castrelo ficou hoxe pequeno para acoller unha asemblea informativa sobre o impacto da central hidráulica de bombeo. De feito, unha parte doas asistentes seguiron a reunión desde fóra.
O acto contou coa participación da deputada do BNG, Noa Presas, da voceira do BNG en Castrelo de Miño, Marián Nieves , do xeólogo e técnico de ADEGA, Fins Eirexas e do enxeñeiro industrial e veciño da localidade, Estevo Suárez.
Presas denunciou “a negativa das institucións á hora de informar á veciñanza arredor de cuestións que lle afectan directamente”. Neste sentido, comprometeu a “posición do BNG a favor da veciñanza, forzando o rexeitamento de todas as institucións en contra do proxecto para evitar que avance cara a vindeira fase do proxecto e morra xa na fase potestativa”
Noa Presas
A deputada nacionalista sinalou que “o Goberno do Estado e da Xunta están traballando para o lobby eléctrico e dándolle as costas ao pobo”. Nesta orientación, asegurou que “encontros coma os de hoxe con información técnica como o que estáfacendo o BNG e organizacións ecoloxistas como ADEGA, debían organizalos as insitucións”
Presas remarcou que o BNG xa presentou mocións para rexeitar o proxecto nos concellos afectados e que “presentará iniciativas co mesmo fin na Deputación de Ourense, no Parlamento da Galiza e no Congreso dos Deputados”.
A voceira do BNG en Castrelo e Miño, Marián Nieves, apostou por levar as institucións a oposición veciñal, destacando que “ningún veciño do concello está a favor do proxecto por iso é momento de rexeitalo”.
O xeólogo e técnico de ADEGA, Fins Eirexas, puxo de manifesto “os impactos de tunelación e movementos de terras que implica o proxecto para a comarca,” así como diversas eivas do proxecto.
Fins Eirexas
Eirexas significou que o proxecto da central implica “a ampliación da concesión do encoro de Castrelo”. Asemade denunciou, que non proxecto non se sinala “cal vai ser o réxime de funcionamento desta balsa ou que se vai facer co entullo resultado das obras que proven das tunelacións”.
O enxeñeiro industrial, Estevo Suárez, puxo en cuestión “a utilidade desta central hidráulica para cumprir os obxectivos de enerxía verde deste proxecto ao empregar máis enerxía para enviar auga á megabalsa que se construirá no coto Novelle que a que xerará”.
