Os sindicatos denunciaron esta segunda feira un novo fechamento do parque de bombeiros de Coruxo en Vigo durante varias horas, debido á falta de persoal, e advertiron de que esta situación, que se vén repetindo de forma habitual nos últimos meses, prodúcese precisamente nunhas datas de grande afluencia de visitantes á cidade.
Segundo sinalaron as centrais sindicais, esta segunda feira están de servizo para toda a cidade 14 bombeiros, en lugar dos 20 (máis un mando) que deberían estar operativos, segundo recolle un decreto municipal, para garantir a seguridade.
O sindicato CUT matizou que, dos 14 efectivos que están a traballar, "só dous son condutores", de maneira que "os máis de 20 vehículos dos parques vigueses "están inutilizados en caso de emerxencia".
"A cidade conta soamente cun vehículo escaleira e unha saída para facer fronte á seguridade, cando debería haber tres saídas completas e seis condutores", advertiu o sindicato nunha nota.
Perigo
Neste escenario, apuntou, o servizo non podería facer fronte a ningunha intervención "de magnitude media", nin atender dúas emerxencias á vez, e deixaría "a metade da cidade" sen cubrir nun tempo de resposta adecuado.
