Un raio alcanzou un avión en pleno proceso de aterraxe no aeroporto de Vigo esta segunda feira provocando, á súa vez, un atraso de máis de sete horas no voo seguinte debido a que a aeronave tivo que ser revisada.
Segundo fontes de Air Europa citadas pola axencia Europa Press, os feitos ocorreron sobre as 8 horas desta xornada, cando o avión, procedente de Madrid, trataba de aterrar en Vigo durante o transcurso da tormenta, sendo alcanzado por un raio.
A pesar de que isto non provocou ningún incidente, a aeronave tivo que ser revisada e, finalmente, levaronse a cabo algúns arranxos na mesma. Así, estes traballos duraron perto de sete horas.
Por iso, o voo seguinte —que usaba o mesmo avión— chegou a Madrid con sete horas e cuarto de atraso, segundo fontes da aerolínea. Esta situación obrigou a perto dun centenar de pasaxeiros a permaneceren en Peinador durante ese tempo, polo que as queixas dos mesmos puideron verse reflectidas en redes sociais.