O profesorado galego "virará San Caetano": CIG-Ensino convoca unha cadea humana e novas mobilizacións os días 28 e 29 de outubro
Docentes da Galiza preparan unha nova semana de mobilizacións para exixir á Xunta da Galiza unha rectificación das súas políticas educativas. CIG-Ensino e STEG chaman o profesorado a sumarse ás xornadas de folga "ante o inmobilismo" do Goberno galego.
A folga docente convocada pola CIG-Ensino co consenso do STEG vivirá o seu punto álxido a vindeira semana cunha dobre xornada de protestas. O sindicato chama o profesorado galego a "rodear e virar San Caetano" a terza feira 28 de outubro, nunha acción simbólica diante da sede da Xunta da Galiza en Compostela, e a saír á rúa o 29 de outubro con manifestacións descentralizadas. En ambos os dous días está convocada unha nova folga docente.
A central sindical mantén o calendario de mobilizacións "ante o inmobilismo da Consellaría de Educación", que —sinala— "segue sen abrir unha negociación real nin dar resposta ás principais demandas do profesorado tras 15 anos de recortes". A CIG-Ensino insiste en que só se cubriron "algunhas das vacantes" nos centros de Infantil e Primaria, mentres as ratios, as condicións laborais e a atención á diversidade "continúan en situacións límite".
Baixo o lema "Imos virar San Caetano e facernos escoitar", a acción da terza feira consistirá nunha cadea humana en movemento arredor do complexo administrativo da Xunta, co obxectivo de "simbolizar a necesidade dun xiro total nas políticas educativas". A organización chama o profesorado a acudir con potas, cazos, pitos, xogos educativos, instrumentos musicais ou ferramentas de ciclos formativos, para converter a protesta nunha gran "cazolada escolar" que leve ás rúas "o son das aulas galegas".
A coincidencia co Samaín tamén será aproveitada para darlle un ton simbólico e reivindicativo á mobilización: o sindicato anima o profesorado a levar cabazas dirixidas ao conselleiro de Educación, Román Rodríguez, "en sinal de rexeitamento pola súa falta de diálogo", así como faixas e pancartas alusivas ás carencias dos centros ou á defensa dun ensino público digno e de calidade. A acción comezará ás 12 horas e haberá autobuses organizados desde distintos puntos do país.
Manifestacións simultáneas
A cuarta feira, 29 de outubro, será a quenda das manifestacións simultáneas en catro cidades galegas, que sairán ás 12 horas e rematarán diante das Delegacións Territoriais da Consellaría de Educación. As marchas partirán da rúa San José de Calasanz na Coruña; da Praza da Horta do Seminario en Lugo; da rúa Concello nº 11 en Ourense; e do IES Valle Inclán, no paseo de Montero Ríos, en Pontevedra.
A CIG-Ensino chama ademais a manter viva a mobilización nos centros durante toda a semana, organizando accións propias, debates e actividades.
