A presión da comunidade educativa do CEIP O Grupo de Ribeira obriga a Xunta a cubrir a titoría vacante tras seis semanas de mobilizacións
A mobilización das familias, do profesorado e da dirección do CEIP O Grupo de Ribeira logrou finalmente o seu obxectivo: a Consellaría de Educación nomeou unha nova titoría para o curso de 3ºB de Educación Primaria, que se incorporará a vindeira segunda feira, 20 de outubro. O posto permanecía sen cubrir desde o inicio do curso, malia as reiteradas peticións da comunidade educativa e do Concello.
Durante seis semanas de protestas, a ANPA Santa Uxía, o claustro e as familias organizaron caceroladas, concentracións, recollidas de sinaturas e mocións plenarias, contando co apoio de toda a corporación municipal, de organizacións sociais e de miles de veciñas e veciños. A dirección do centro chegou incluso a presentar a súa dimisión en bloque en dúas ocasións, en sinal de protesta pola inacción da Xunta da Galiza.
Desde a ANPA subliñan que a cobertura da praza "é un logro colectivo froito da unión e da loita pola defensa do ensino público". A partir desta segunda feira, o colexio contará de novo con 13 titoras e titores en Primaria, o que permitirá "retomar proxectos educativos paralizados, mellorar as gardas e garantir unha atención axeitada a todo o alumnado", especialmente ao cento de estudantes con necesidades específicas de apoio educativo.
"Froito da forza e da unidade das familias"
O BNG de Ribeira felicitou a comunidade educativa pola súa perseveranza. O ex alcalde e portavoz municipal, Luís Pérez Barral —que recibiu o agradecemento expreso da ANPA polo seu apoio nas últimas semanas e a súa presenza nas mobilizacións—, destacou que "este logro é froito da forza e da unidade das familias, que non se resignaron a aceptar unha situación inxusta".
O BNG, que xa levara o caso ao Parlamento galego, manterá as súas iniciativas para que a Consellaría acometa as melloras pendentes no centro: a reforma integral do edificio da antiga comisaría, o arranxo da cuberta de Infantil e o pintado do edificio principal.
Barral concluíu que "a mobilización e a unidade demostraron ser o camiño para conquistar dereitos e mellorar a educación pública", mentres que a ANPA anunciou o fin das protestas, mais advertiu que seguirá vixiante "para que se cumpran as promesas e se melloren os recursos".
