Lugo e Ourense, únicos territorios do Estado cuxas pensións de xubilación non chegan aos 1.000 euros

Segundo os últimos datos publicados polo Instituto Nacional da Seguridade Social (INSS), correspondentes ao pasado mes de marzo, a Galiza ten as pensións —agrupando as diferentes prestacións por incapacidade, xubilación, etc.— máis baixas de todo o Estado español, cunha contía media de 926,44 euros mensuais, moi lonxe de Euskadi, que lidera a táboa con 1.347,16 euros. Mais a situación agrávase cando falamos da pensión media por xubilación, que na Galiza é de 1.057,67 euros por mes, unha cifra só superior á de Estremadura (1.040,2) e afastada, novamente, de Euskadi (1.532,65). Porén, na Galiza obsérvase unha importante fenda entre os territorios atlánticos da Coruña (1.116,41 euros/mes) e Pontevedra (1.114,75) e Lugo e Ourense, que son os únicos de todo o Estado que non alcanzan os 1.000 euros mensuais de prestación por xubilación. Deste modo, en Lugo a pensión media para as persoas xubiladas é de 941,39 euros, mentres en Ourense é aínda inferior: 885,18. No extremo oposto está Bizkaia (1.563,45 euros/mes). No conxunto do Estado español, segundo os datos da Seguridade Social, a prestación media por xubilación é de 1.250,37 euros por mes. Centos de xubilados protestan contra a reforma das pensións, que soben 2,5% fronte á repunta de 6,5% do IPC Segundo as mesmas estatísticas de marzo de 2022, na Galiza hai un total de 768.704 persoas pensionistas, das que 70.902 reciben a prestación por incapacidade permanente; 482.602, por xubilación; 185.058, por viuvidade; 23.373, por orfandade, e 6.679 en favor de familiares. No que atinxe ás persoas autónomas do país, cómpre lembrar que reciben a prestación por xubilación máis baixa do Estado: 651,87 euros mensuais, case 200 euros menos que a media estatal.