Un tornado rexistrado esta segunda feira no municipio de Oza-Cesuras (As Mariñas) levou por diante os tellados de dúas vivendas e dun garaxe no lugar de Penabelá, na parroquia de Rodeiro, así como unha ducia de árbores.
Segundo informou o 112 Galiza, a central de emerxencias tivo coñecemento dos feitos pola tarde.
Nese momento, un particular chamaba alertando de que o vento derrubara o tellado da súa casa e do garaxe, ademais de danar o seu vehículo.
Pouco despois, outro veciño comunicaba feitos similares, detallando danos no tellado doutra vivenda do lugar.
Intervencións
Con esta información, o 112 Galiza deu aviso aos axentes da Garda Civil, aos técnicos da empresa subministradora da rede eléctrica e aos Bombeiros de Betanzos, que levaron a cabo diversas intervencións pola zona e confirmaron que o vento tirara máis dunha ducia de árbores de grandes dimensións.
