'Nós Diario' é recoñecido co Premio Moncho Valcarce
Nós Diario resultou gañador do Premio Moncho Valcarce pola promoción da Terra. O xurado destaca deste xornal o feito de ser "unha referencia necesaria e indispensábel para milleiros de galegas e galegos orfos durante tantos anos dun xornal escrito integramente en galego, independente, con información veraz e de calidade".
A Irmandade Moncho Valcarce, que outorga o galardón, salienta que este xornal "dá espazo a persoas e colectivos marxinados en outros medios e sen dependencias de poderes políticos ou económicos". Neste sentido, tamén considera que "é fundamental a consolidación de Nós Diario como un espazo galego de comunicación centrado en e por Galiza".
Pola defensa da Terra
Pola súa parte, o Premio Moncho Valcarce pola defensa da Terra recaerá na figura de Manuel Monge González, do que se destaca a súa faceta de activista, así como de promotor e fundador de distintas entidades (Foro cívico, Comisión pola recuperación da Memoria Histórica, asociación pedagóxica Nova Escola Galega ou Galiza pola República, entre outras). O colectivo tamén valora o seu papel como colaborador en distintos medios de comunicación -entre eles Nós Diario- e a autoría de máis de 14 libros.
Así mesmo, a Irmandade Moncho Valcarce lembra que Monge González foi militante de distintas organizacións políticas -desde o ano 1994 do BNG, forza coa que foi elixido concelleiro na cidade da Coruña durante un mandato-.
Desta maneira, Nós Diario e Monge González únense a un grupo das 38 entidades e persoas que resultaron galardoadas co Moncho Valcarce. Colectivos galegos de prestixio como a Asociación Socio Pedagóxica Galega, a Mesa pola Normalización Lingüística, a Asociación Cultural Alexandre Bóveda, o Museo do Pobo Galego ou o grupo musical A Quenlla xa foron premiados antes con este galardón.
Pola súa parte, a nivel individual, foron homenaxeadas figuras senlleiras do país como Isaac Díaz Pardo, Avelino Pousa Antelo, Xosé Chao Rego, Manuel Caamaño, Camilo Nogueira ou Xosé Manuel Beiras.
O cura das Encrobas
Moncho Valcarce, tamén coñecido como o cura das Encrobas, fíxose particularmente coñecido pola súa participación no conflito desta lugar, no que a empresa Lignitos de Meirama quería acceder ás terras do campesiñado a cambio de baixas indemnizacións. En 1977, foi detido nas manifestacións e enfrontamentos coa Garda Civil durante esta mobilización.
Porén, Valcarce xa fora apresado en 1974 durante tres días polo seu compromiso social durante o réxime franquista, e a partir dese momento intensificou máis a súa implicación na política. Tamén participou na creación de Fouce, a revista das Comisións Labregas. Por outra parte, en marzo de 1977 -o mes seguinte á súa detención no conflito das Encrobas-, converteuse formalmente en militante da AN-PG (Asemblea Nacional-Popular Galega).