A Galiza rexistrou 1.151 nacementos no mes de xaneiro deste ano, o que se traduce en 7,1% menos que no mesmo período de 2022, segundo a estimación achegada esta cuarta feira polo INE. Este dato implica á súa vez unha caída de 13,65% en comparanza con xaneiro de 2019, antes de que se iniciase a pandemia do coronavirus.
Esta é a cifra máis cativa de nacementos mensuais desde abril de 2022, cando se produciran un total de 1.098 nacementos. Nesta serie histórica do INE que comeza en 2016, con todo, a Galiza non baixou nunca do milleiro de neonatos, se ben desde entón sofre unha incesábel caída da natalidade en termos anuais, pasando dos 19.062 nacementos cos que fechou o ano 2016 aos 14.558 de 2022.
As mulleres de entre 35 e 39 anos de idade seguen a ser maioría entre as nais totais do país —4.878 ao remate do pasado ano—, seguidas moi de perto do grupo etario inmediatamente anterior, o de 30 a 34 anos —4.474—. As de entre 20 e 29 anos, porén, non alcanzan as 3.000.
Esta proporción é semellante á rexistrada no último lustro, sen apenas variacións significativas, e a mesma tendencia seguiu tamén este pasado mes de xaneiro, con maioría de nais de 35 a 39 anos (383), seguidas das de 30 a 34 (367), as de 40 a 44 (152), as de 25 a 29 (170), as de 20 a 24 (54), as de 45 a 49 (14), as de 15 a 19 (10) e as maiores de 50 anos (1).
No conxunto do Estado español contabilizáronse en xaneiro un total de 27.185 bebés, isto é, 1,76% menos que no primeiro mes do pasado ano e até 11,9% menos que en xaneiro de 2019.
Defuncións
Por outra parte, e tamén con base nos últimos datos do INE, o número de defuncións na Galiza nas oito primeiras semanas do presente ano —até o 26 de febreiro— situouse en 5.801, o que representa 0,74% menos que no mesmo período de 2022 e 3,28% máis que en 2019.
A nivel estatal, producíronse entre xaneiro e febreiro 78.815 mortes, 3,76% menos que nos dous primeiros meses de 2022 e 1,05% máis que no mesmo período de hai catro anos.