O encontro de mulleres xornalistas As Mulleres que Opinan Son Perigosas chega este 2024 á súa sétima edición, que decorrerá no Teatro Principal de Pontevedra entre a sexta feira 15 de marzo e o sábado 16, coa participación de relatoras de recoñecido prestixio como Olga Viza, Lucía Méndez e Mariola Cubells. As organizadoras deste encontro, Diana López e Susana Pedreira, presentaron esta cuarta feira a programación do evento, nun acto que contou coa participación do alcalde de Pontevedra, Miguel Anxo Fernández Lores, e mais do presidente da Deputación, Luís López.
O 15 de marzo, ás 12.30 horas, intervirán Carolina Sertal e Carmen G. Magdaleno, gañadoras do primeiro Premio de Opinión 'MulleresQueOpinan'. Despois, ás 13.15 horas, seguirá a conferencia da guionista, podcaster e realizadora audiovisual Lula Gómez, que leva por título: Entender e desmontar o machismo: 'es unha caca'.
Para a tarde dese día está prevista a intervención da escritora Mercedes Corbillón, que falará sobre A beleza e a opinión nunca deben morrer. Pola súa parte, a xornalista, cómica e actriz Xasmín Abuín disertará sobre o tema Desde a comedia e con retranca tamén se opina, mentres que a xornalista especializada en maternidade, infancia e saúde Diana Oliver falará de Maternidades precarias: entre o privilexio e a incerteza. A sesión vespertina da sexta feira concluirá co relatorio de Lucía Méndez, xornalista de El Mundo, que leva por título Tres décadas observando e relatando o poder.
A xornada do sábado 16 arrinca ás 12h do mediodía coa conferencia Ética xornalística no tratamento da violencia machista, a cargo de Ana González Liste, de Praza.gal. A continuación, ás 12.45h, a redactora xefa en El País e directora de Materia, Patricia Fernández de Lis, falará sobre ciencia, tecnoloxía e saúde con perspectiva de xénero. Fechará a sesión matinal a intervención de Isabel Cadenas Cañón, xornalista, escritora e documentalista sonora con Diso SI se fala: mulleres rompendo silencios persoais e colectivos.
Tras unha pausa para o xantar retómanse ás 17h as conferencias da man de Cláudia Morán, columnista de Nós Diario, co tema Vivir aquí: opinar desde o propio. Ás 17.45 horas será a quenda de Noor Ammar Lamarty, activista xurídica e podcaster que disertará sobre Repensar o feminismo: apartheid de xénero e construción do relato.
Dúas comunicadoras de renome fecharán esta sétima edición do foro: ás 18.45 horas intervirá Mariola Cubells, de La Ventana da Cadena SER e El Huffington Post, con Mellor que nunca: a revolución das mulleres +60, e, finalmente, ás 19.30h, a xornalista e presentadora de televisión Olga Viza, con Referente e pioneira: a información deportiva leva o seu nome.
