O compromiso coa igualdade nos programas das municipais 2023

Hai tempo que o feminismo defende que o número de mulleres que encabecen candidaturas electorais non define en modo algún o compromiso político coa igualdade. De sobra coñecemos mulleres en cargos institucionais que non só non fixeron políticas de igualdade senón que mesmo as combateron e fixeron retroceder os dereitos das mulleres. Para exemplo Ursula von der Leyen, presidenta da Comisión Europea, e Christine Lagarde, presidenta do BCE, ambas corresponsábeis das políticas económicas neoliberais de Europa que asfixian a clase traballadora, nomeadamente as mulleres. O realmente importante, como defende o feminismo organizado, non son as caras, senón os compromisos reais, individuais e colectivos, coas políticas públicas que defenden e fan avanzar os dereitos das mulleres. Ese debe ser o lugar ao que mirar cando analizamos o compromiso das formacións coa igualdade. Programas sen destacar O primeiro intento de achegarse aos programas electorais dá como resultado que as webs das organizacións políticas non dedican un lugar excesivamente destacado que nos permita acceder de forma simple e intuitiva ao contido das propostas programáticas e temos que procurar por diferentes vías, e non sempre con moito suceso, para conseguir a información. Unha diría que en plena explosión do uso das redes e a información dixital debera ser relativamente simple acceder aos programas marco das municipais de 2023 de calquera formación política. BNG e PP elaboran un documento marco nacional, mais non así o PSOE e IU A primeira diferenza de calado é o marco político dende o que se elaboran as propostas programáticas. Mentres algunhas formacións políticas como o BNG ou o PP elaboran un documento marco nacional con propostas que desenvolven e concretan nos programas locais, outras forzas políticas obvian este marco e só é posíbel atopar as propostas marco que fan para o conxunto do Estado español, caso de IU ou PSOE, e que están totalmente despegadas da realidade do país, sen ben algunhas delas poden ser trasladadas e concretadas nas propostas que se realizan para cada Concello. O Partido Popular, que apenas elabora programas municipais e aí onde goberna en lugar de crear destrúe as políticas de igualdade existentes, traballa co documento marco nacional, mais apenas concreta medidas ou propostas políticas en relación á igualdade na política municipal. Con diferentes referencias a competencias que sobrepasan en moito o ámbito local e xeneralidades vacuas despacha o apartado titulado “Por unha verdadeira igualdade”. En relación á violencia machista e a conciliación, outras ideas presentes no documento, as únicas propostas que poden desenvolverse dende os Concellos teñen a ver cos Plans de igualdade, para os que tampouco hai propostas concretas. Só no apartado de “Protexendo a maternidade” aparecen propostas que poden trasladarse á acción municipal, reforzando o programa ideolóxico do PP de circunscribir a igualdade e os dereitos das mulleres aos roles de coidadoras e nais. Se existe un programa marco galego do programa das municipais do PSOE, non é doado de atopar dispoñíbel para a súa consulta. Si existe a posibilidade de consultar o programa marco estatal onde aparecen as propostas en materia de igualdade no epígrafe “A Igualdade como eixo transversal da política municipal” con medidas centradas na xestión municipal (plans, ordenanzas, concellarías, orzamentos, persoal, protocolos…). Sen dúbida, o programa máis completo en materia de igualdade é o do Bloque Nacionalista Galego, que non só realiza propostas no ámbito da xestión municipal senón que propón incorporar a estas políticas sociais que permitan un maior alcance e interveñan na vida pública local. Cuestións como os traballos feminizados, a economía social, o papel das mulleres ou a innovación, a contratación pública con perspectiva de xénero, as mulleres e as TIC, a ocupación do espazo público ou a implicación social das mulleres só aparecen no programa das nacionalistas. Só no programa electoral do BNG para as municipais de 2023 aparecen referencias aos Centros de Información á Muller ou ás Mesas de Loita contra a violencia machista, ferramentas importantes para desenvolver políticas públicas de igualdade dende os Concellos. Do mesmo modo, só no programa das nacionalistas se fai referencia ao apoio que dende a política local se debe facer ao feminismo organizado, actor político fundamental e imprescindíbel para a transformación social.