Manifestantes reclaman en Vigo e A Coruña a inclusión dos cans de caza na lei de benestar animal
As mobilizacións decorreron este domingo en 45 cidades do Estado español.
Centos de persoas manifestáronse este domingo en 45 cidades do Estado español, entre elas Vigo e A Coriña, para mostrar o seu rexeitamento á non inclusión dos cans de caza no proxecto de Lei de Benestar Animal, como pretende o grupo parlamentario do PSOE, ao considerar que todos os cans son iguais ante a lei e, por tanto, merecen o mesmo trato.
"Son millóns de cans de caza os que son maltratados continuamente por parte dos cazadores e fano co apoio das institucións. Pedimos a abolición da caza. A proposición do PSOE é un despropósito. Non se pode diferenciar uns cans doutros. A sociedade demanda un mellor trato para os animais e eles están cos que os matan", asegurou o presidente de Pacma, Javier Luna.
A manifestación, convocada pola Plataforma Nacional Plataforma NAC (Non á Caza con Galgos e Outras Razas) en 45 cidades, contou tamén coa participación e apoio da Asociación Parlamentaria en Defensa dos Dereitos dos Animais (APPDA).
Segundo os cálculos dos animalistas, 68% dos cans que se abandonan no Estado español son aqueles que se utilizan para a caza, como comentou este domingo o portavoz da Plataforma contra a Caza, David Rubio.
"É incríbel que tenten facer unha lei de protección animal contra o abandono e se deixe o principal motivo diso (os galgos). España é o único país europeo que segue permitindo a caza con cans e é onde máis se abandonan", sentenciou.
A plataforma NAC argumenta que excluír aos cans dos cazadores na nova lei de protección, dereitos e benestar animal supón discriminar os cans pola actividade que exerzan, o que supón un "retroceso e puro racismo obsoleto".
Nese sentido, os convocantes consideran que non ten ningún sentido que uns cans queden protexidos e amparados por lei e outros non, algo que supoñería perpetuar os malos tratos animais no Estado español. "Unha Lei debe axudar a avanzar a unha sociedade e non mantela impune ás inxustizas", apunta a organización nun comunicado.
Doutra banda este domingo manifestáronse tmén as asociacións que están en contra da lei, a Federación das asociación unidas pola natureza e os animais (Federación Fauna), os comercios especializados e as tendas tradicionais de venda de animais para mostrar o seu desacordo cunha norma que "non protexe aos animais" e denunciar que non contou co consenso dos profesionais.