As incidencias causadas por 'Kirk' achéganse ás 600: desprendementos, estradas cortadas e inundacións
O paso da borrasca Kirk pola Galiza deixa multitude de incidencias que a central de emerxencias contabiliza en case 600, a maioría asociadas a desprendementos, estradas cortadas pola caída de árbores e inundacións. Segundo o balance ofrecido pola Axencia Galega de Emerxencias, entre a tarde da terza feira e as 11 horas desta cuarta, o 112 atendeu 565 incidencias asociadas aos fortes ventos e ás intensas precipitacións. Ningunha delas causou feridos.
A maioría dos problemas reportados ao 112 están asociados a estradas cortadas por caídas de árbores, ramas e outros obxectos. Até o momento, cóntanse 355 por árbores sobre a vías, 44 por obxectos e 34 por cables, postes de luz e teléfono. Ademais, houbo 44 accións preventivas dos equipos de emerxencias para retirar vexetación e obxectos inestábeis, unha ducia de desprendementos de terra e pedras, 13 caídas de carteis e sinais e doce por elementos procedentes de tellados e fachadas.
O suroeste é, até o momento, a zona máis afectada con 304 incidencias, con Vigo á cabeza con 53, entre elas, a caída dalgúns elementos da iluminación do Nadal que xa coloca a cidade olívica desde hai aproximadamente un mes. A Estrada (Tabeirós-Terra de Montes), con 23; Pontevedra, tamén con 23: Nigrán (comarca de Vigo), con 18; ou Ponteareas (O Condado), con 13, son outros dos municipios que máis problemas rexistraron.
No noroeste contabilízanse 162 incidencias, 20 delas en Compostela, as máis destacadas, os desprendementos do tellado do conservatorio de música ou o desprendemento de elementos nun edificio do rúa do Preguntoiro. En Padrón, Kirk deixa unha ducia de problemas, a maioría, inundacións polo desbordamento do río Sar.
No sureste, o 112 xestionou 50 incidencias con 6 en Celanova (Terra de Celanova) e 4 no Bolo (comarca de Viana), mentres que no resto do país houbo 42, con Lugo á cabeza (4) xunto con Guitiriz (4).
Incidencias destacadas
Entre as incidencias máis destacadas, o 112 inclúe o derrube dunha parede dun pavillón dun centro educativo en Porto do Son (comarca de Noia), o desprendemento do falso teito da entrada dun colexio en Monforte (Terra de Lemos) ou os problemas causados á entrada doutro centro en Redondela (comarca de Vigo) por unha árbore caída.
Os problemas nas estradas, xeneralizados en toda a Galiza, motivaron a intervención dos servizos de emerxencia en centos de puntos, como no desprendemento de terra e pedras que invadiu tres carrís en Lousame (comarca de Noia).
Ríos en risco de inundación
Ademais, 11 ríos están en vixilancia por risco de desborde tras as fortes choivas das últimas horas que xa provocaron inundacións nos leitos do Verdugo ao seu paso por Ponte Caldelas (comarca de Pontevedra), o Anllo, en Vilalba (A Terra Cha), e o Sar, en Padrón (comarca do Sar).
Dentro do Plan de seguimento e control dos caudais dos ríos (Plan Inungal), a central de emerxencias vixía especialmente os ríos Tambre, Mandeo, Mendo, Dubra, Verdugo, Lérez, Tea, Landro, Ladra, Masma e Ouro.
A Axega apela a reducir o paso e a presenza tanto de persoas como de vehículos á beira destes cursos, así como abandonar calquera actividade fluvial que poida comprometer a nosa seguridade.
