Familias do Courel logran suspender as aulas ante o incremento da perigosidade na estrada pola chegada de 'Kirk'
Coa chegada do outono e do mal tempo os problemas de mobilidade na contorna do colexio de Folgoso do Courel van a máis. Esta cuarta feira, segundo informan desde a ANPA do CPI Poeta Uxío Novoneyra, suspendéronse as clases por mor da adversa climatoloxía, despois da oposición das familias a que os seus fillos e fillas circulen polo desvío provisional habilitado pola Xunta.
Nun comunicado dirixido aos medios, as familias trasladan a súa "gran preocupación polas circunstancias extremas que estamos vivindo. As intensas chuvias que afectan o noso concello están incrementando a perigosidade do vergoñento desvío habilitado entre Seoane e o colexio, o cal xa presentaba graves problemas de seguridade en días normais".
Así, as familias da parte norte do Courel, que son as que dependen deste desvío para levar aos seus fillos e fillas ao colexio, tomaron a decisión de non arriscar e deixar as crianzas na casa para evitar o percorrido, antes mesmo de que desde a escola confirmasen a suspensión das aulas.
Un desvío perigoso
O desvío, que segundo lembran ten firme de formigón, seixos rodados e pendentes de até 30%, é "especialmente esvaradío e perigoso". "Na nosa opinión, é totalmente inaceptábel que sexamos as familias as que teñamos que optar por estas medidas de precaución ante a falta de actuación das autoridades competentes".
En solidariedade cos familias que optaron por deixar os seus fillos e fillas na casa, tamén as que non dependen do desvío optaron por non enviar os seus nenos e nenas ao colexio. "Consideramos que a situación de hoxe constitúe, na práctica, unha folga de facto debido á perigosidade do desvío, á inseguridade que supón transitalo baixo estas condicións meteorolóxicas e á indiferenza da administración para tomar medidas ao respecto".
Obras que non rematan
Desde a ANPA advirten que as Consellerías de Educación e Mobilidade "son plenamente conscientes dos perigos que presenta este infame desvío", ás que recriminan a falta de medidas efectivas para garantir a seguridade das crianzas.
A comunidade educativa do CPI Poeta Uxío Novoneyra urxe ao Goberno galego "unha solución urxente a este problema, máis tendo en conta que a promesa de abrir o tráfico de novo na LU-651 a partir da sexta 11 de outubro non se vai cumprir, tal como xa supoñiamos cando empezou o corte hai máis de dous meses".
Neste sentido tamén lle reprochan á Consellería de Mobilidade a súa falta de "cortesía" ao non responder á petición das familias "dun vehículo con tracción ás catro rodas para que faga de lanzadeira entre Seoane e o Colexio", co agravante de que Folgoso do Courel é "un concello de montaña cunhas características especiais que fan máis relevantes as situacións extremas" como a que están a denunciar.
