O último balance epidemiolóxico facilitado pola Consellaría de Sanidade reflicte un novo avance da pandemia de Covid na Galiza, en risco de transmisión alto.
Con datos até as 18 horas da pasada cuarta feira, hai 10.204 persoas infectadas polo coronavirus en todo o territorio, supoñen 640 máis que a xornada anterior e 3.700 máis que hai unha semana.
Por áreas sanitarias, Vigo manténse á cabeza con 3.135 casos activos; seguida da de Ourense, con 2.498; Pontevedra, con 1.394; A Coruña, con 1.367; Lugo, con 696; Santiago, con 682, e Ferrol, con 432.
O Sergas notifica, ademais, 1.034 novos contaxios, o que representa unha suba de 254 con respecto ao mesmo día da semana pasada. Do total de novos positivos, Vigo anotou 396; Ourense, 228; Pontevedra, 160; A Coruña, 97; Santiago, 71; Lugo, 52, e Ferrol, 30.
Presión hospitalaria
Segundo os datos publicados por Sanidade aumentan a 37 as persoas ingresadas en UCI, dúas máis, e a 219 as hospitalizadas noutras unidades, tres máis, mentres que un total de 9.948 pacientes permanecen en seguimento nos seus domicilios.
A presión hospitalaria aumenta lixeiramente enVigo, Lugo e Ferrol, alívia na A Coruña e Santiago, mantense en Pontevedra e permanece sen cambios na de Ourense, con sete pacientes Covid en UCI e 62 noutras unidades de hospitalización.
No caso da área de Vigo aumentan a 16 os pacientes Covid en críticos, un máis, e a 63 os ingresados noutras unidades, tres máis,; mentres que na de Lugo seguen catro en UCI e soben a 12 os hospitalizados noutras unidades, dous máis.
A área de Ferrol continúa sen pacientes Covid en UCI e rexistra 18 noutras unidades, dous máis, e na de Pontevedra increméntanse a tres os críticos, un máis, pero descenden a 35 os ingresados noutras unidades, un menos.
Pola súa banda, a área de Santiago segue con tres pacientes Covid en UCI e descenden a nove os ingresados noutras unidades, dous menos; mentres que na da Coruña e Cee continúan catro en críticos e baixan a 20 os doutras unidades, un menos.
Incidencia e positividade
A taxa de positividade das probas PCR nos últimos sete días mantense por riba de 10%, afastada de 5% que recomenda a OMS para dar por controlada a transmisión do virus. Polo que se refire á incidenica acumulada, no conxunto da Galiza, a 14 días, sitúase por riba dos 340 casos por 100.000 mentres que a unha semana supera os 200.
Estas cifras que manteñen o territorio en risco alto de transmisión, mais con valores dispares segundo a área sanitaria. De feito, a incidencia a dúas semanas oscila entre os 760 casos de Ourense e os 139 de Santiago.
Falecementos
Desde o inicio da pandemia, as persoas falecidas diagnosticadas con Covid mantéñense en 2.690.
