O xulgado de instrución número 3 de Santiago fechou a investigación do accidente do tren Alvia ocorrido o 24 de xullo de 2013 no barrio compostelán de Angrois e no que faleceron 81 persoas.
O seu titular, Andrés Lago, defende que a causa continúe contra o maquinista e contra o director de seguridade do tráfico de Adif no momento en que se puxo en funcionamento a liña, por se os feitos que se lles imputan fosen constitutivos de 88 delitos de homicidio por neglixencia profesional grave e 144 de lesións.
O instrutor acepta, no auto notificado hoxe, que se traslade a Fiscalía e, no seu caso, ás acusacións particulares, para que en 10 días poidan formular un documento de acusación "solicitando a apertura dun xuízo oral ou o sobresemento do caso ", informan fontes do Tribunal Superior de Xustiza da Galiza (TSXG). Pero sinala que "excepcionalmente" poden solicitar a práctica de procedementos complementarios que se consideren "esenciais" para formular a acusación.
A Audiencia Provincial da Coruña ditara o 27 de maio de 2016 un auto polo que ordenaba reabrir a investigación do caso Alvia a respeito do accidente.
Vítimas do accidente do Alvia ven no feito de que a causa continúe contra un alto cargo de Adif a "demostración" de que "a investigación oficial é unha farsa". A pescuda, levada a cabo pola Comisión de Investigación de Accidentes Ferroviarios apuntou ao maquinista do convoi sinistrado como único responsábel.
Así, a plataforma de persoas afectadas polo accidente reclama que se repita esta investigación “tal e como pide Europa” e que “sexa independente”. O seu voceiro, Jesús Domínguez, avanzou que o colectivo recorrerá o fechamento da causa, o terceiro desde o comezo da instrución.