A familia de María del Carmen Fernández, a galega desaparecida o pasado mes de setembro no buque oceanográfico García do Cid do Consello Superior de Investigacións Científicas (CSIC), prepara máis accións xudiciais despois de que a Audiencia Provincial de Valencia confirmara a semana pasada o auto do Xulgado de Instrución número 3 de Gandía que decretaba o arquivo e sobresemento provisional da causa.
Tal como confirmou o portavoz da familia, o avogado Diego Leis, na actualidade estudan "posíbeis accións xudiciais", xa que entenden que pode haber responsabilidades da empresa, ao desaparecer mentres traballaba.
"Estamos en fase de estudo para facelo coas máximas posibilidades de éxito", indicou Leis, en declaracións á axencia Europa Press. Por iso, dixo que están a recompilar documentos e probas para analizar que accións levar a cabo. Todo iso despois de que se confirmase o arquivo da causa da desaparición da galega, natural de Cangas (O Morrazo).
Feitos
A desaparición de Fernández foi notificada, pola propia tripulación do barco, a Salvamento Marítimo o 10 de setembro de 2023, cando os seus compañeiros botárona en falta. Aínda que se iniciou un dispositivo de procura, non se localizou o seu corpo. A muller denunciara no pasado por acoso un compañeiro de tripulación (o caso arquivouse no ano 2019), e mesmo solicitara o seu traslado a outro barco.
Antes de partir para a viaxe na que desapareceu, Carmen, que traballaba de camareira no barco, coincidiu con ese compañeiro en porto, que non chegou a embarcar por motivos de saúde.
