Falece no hospital o rapaz de 14 anos que se precipitou dun noveno piso na Coruña

O menor que se precipitou na mañá da terza feira desde un noveno piso nun edificio situado no barrio dos Rosais, na Coruña, faleceu debido ás lesións sufridas.

Os feitos sucederon sobre as 11 horas e, de acordo cos datos que se tiveron constancia en relación ao suceso, caeu desde un noveno piso sobre un vehículo estacionado na rúa Simón Bolívar. Até o lugar desprazáronse os servizos sanitarios, que o trasladaron con vida ao Hospital Materno Infantil Teresa Herrera, onde, finalmente, faleceu a última hora.

Tras os feitos, ao lugar tamén acudiron patrullas da Policía Local e da Policía Nacional, que investiga os feitos. Polo momento, fontes próximas ao caso apuntan a que non se trataría dun feito delituoso e non descartan ningunha hipótese.

Primeiro auxilio

En declaracións, a primeira persoa en atender o menor, o propietario dun taller situado nos baixos dun edificio con acceso tamén pola rúa Emilio González, explicou que escoitou un golpe "moi forte" coma se alguén patease" a porta do seu negocio.

Con todo, Félix Aumaitre, que atendeu o novo, duns 14 anos, até a chegada dos servizos de emerxencia, sinalou que, ao saír, comprobou que estaba o mozo.

Tras descartar que fose atropelado, algo que, segundo expuxo, pensou inicialmente, e comprobar que estaba vivo, púxose en contacto co 112 e seguiu logo as indicacións dun médico co que falou, ademais de sacar unhas mantas coas que tapalo.

Tamén precisou que apareceu a nai e máis tarde o pai, á vez que se desprazaron ao lugar efectivos policiais e sanitarios.

Ao parecer, o menor tiña moita febre motivo polo que se atopaba na casa, onde, segundo o que transcendeu, a súa proxenitora estaba a teletraballar. Agora investígase un suceso acollido con consternación polos veciños e veciñas.