Explosivos e ollos de animais. Así eran as cartas enviadas polo xubilado de Burgos
O xubilado que foi detido esta cuarta feira en Miranda de Ebro como presunto autor do envío de cartas explosivas desde a súa casa á Presidencia do Goberno e embaixadas declarará esta sexta feira ante o xuíz da Audiencia Nacional José Luis Calama.
P.G.P., de nacionalidade española e 74 anos de idade, está considerado como o responsábel do envío das seis cartas con material deflagrante remitidas a finais do pasado mes de novembro e principios de decembro a diferentes empresas e institucións como Presidencia do Goberno, a Embaixada de Ucraína no Estado español ou a Embaixada de Estados Unidos en tamén no Estado español.
Trátase dunha persoa moi activa en redes sociais e, de acordo cos investigadores, ten coñecementos técnicos e informáticos, segundo informaron fontes do Ministerio do Interior e da Policía Nacional. O Concello de Vitoria confirmou que foi funcionario deste consistorio até 2013.
O arrestado residía nunha pequena vivenda na rúa do Caravel de Miranda de Ebro, onde especialistas da Policía Nacional levaron a cabo un rexistro antes do seu paso ao dispor do titular do Xulgado Central de Instrución Número 4, que investiga o envío destas cartas con material pirotécnico.
Os achados
Entre outros achados encontráronse outras cinco cartas similares polas súas características e contido ás recibidas pola Embaixada de Ucraína e a Embaixada de Estados Unidos en Madrid, pola empresa Instalaza en Zaragoza, polo Centro de Satélites da Unión Europea situado na Base Aérea de Torrexón e polo Ministerio de Defensa.
Un vixiante de seguridade da Embaixada de Ucraína resultou ferido pola explosión dun dos artefactos. Tamén houbo envíos con sobres que tiñan nos seus interior ollos de animais.
O pasado 3 de xaneiro o xuíz da Audiencia Nacional que investiga o envío desta serie de cartas explosivas acordou abrir unha nova liña de investigación na causa para levar a cabo unha serie de pescudas de carácter tecnolóxico.
Investigación “complexa”
O Ministerio do Interior subliñou que a investigación foi moi "complexa e laboriosa", afectando varias provincias do Estado. As dilixencias puideron determinar que todos os envíos das seis cartas realizáronse desde a cidade de Burgos.
O pasado 24 de novembro foi detectada unha carta con material explosivo dirixido ao presidente do Goberno, Pedro Sánchez, que fora remitido por correo postal ordinario.
Os servizos do Departamento de Seguridade de Presidencia do Goberno detectaron a carta nas tarefas de cribado e filtrado da correspondencia.