O ex futbolista do Dépor Donato chama a unha "intervención militar" após a vitoria de Lula da Silva

O ex futbolista do Real Club Deportivo da Coruña de orixe brasileira, Donato Gama da Silva, chamou esta terza feira a unha "intervenção militar" após a vitoria nas eleccións presidencias do pasado domingo en que o líder do Partido dos Trabalhadores (PT), Luiz Inácio Lula da Silva se impuxo ao anterior presidente do país, Jair Bolsonaro.

Fíxoo a través da rede social Instagram cunha mensaxe que pouco tardou en se espallar por internet xerando millares de réplicas en múltiples redes sociais.

Na mensaxe publicada polo ex deportivista pódese ler: "A guerra ainda não terminou, o povo brasileiro acordou. Isso não vai ficar assim. Se o povo vai para as ruas pode haver intervenção militar".

"Comunismo não pode voltar ao poder"

Ademais, a mensaxe continúa dicindo "O comunismo não pode voltar ao poder. Não tirem a toalha".

Donato, que tamén fora adestrador do Viveiro, está a ser moi criticado en redes socias. De feito até está a nacer un movemento creado por certa veciñanza da Coruña que insta a quen se encontrar co ex futbolista pola rúa a que lle faga o símbolo do 'L' cos dedos, un xesto propio dos seguidores de Lula da Silva.

Bolsonaro continúa sen falar

No medio desta polémica, o candidato Jair Bolsonaro, derrotado nas eleccións do pasado domingo, segue sen pronunciarse sobre a vitoria do seu contrincante nun Brasil paralizado por centenares de camioneiros que non aceptan a derrota do líder da ultradereita brasileira.