A empresa concesionaria do Hospital Álvaro Cunqueiro de Vigo, un conglomerado de construtoras e fondos de investimento, viuse obrigada a pagar 475.000 euros en 2021 ao Servizo Galego de Saúde (Sergas) pola “falta de calidade” dos servizos sanitarios.
Trátase da segunda maior sanción que recibe esta compañía desde que o centro hospitalario fose inaugurado en 2015. En 2018, a contía da sanción alcanzou os 713.000 euros.
En total, a concesionaria presta un total de doce servizos, entre clínicos e non clínicos. Neste segundo grupo, o maior é o da limpeza, precisamente o que maior porcentaxe da sanción representa. Deses 475.000 euros, 205.000 euros corresponden á falta de calidade nestes labores.
Outros dos servizos que maior sanción económica supuxeron foron os de restauración e lavandaría, ao sumar 63.000 euros cada un.
Servizo de limpeza no Cunqueiro
O servizo de limpeza no Álvaro Cunqueiro está subcontratado nunha filial de Acciona, unha empresa española de promoción e xestión de infraestruturas e enerxías renovábeis. En 2020, traballadores e traballadoras da limpeza mobilizáronse para exixir o reforzo dos cadros de persoal, ante a falta de efectivos.
Nunha situación de especial tensión pola pandemia, os profesionais demandaban que a empresa aumentase o número de traballadores, para poder cubrir as exixencias de limpeza e hixiene que requiría o contexto sanitario derivado da Covid-19.
O comité de empresa chegou a convocar unha folga indefinida en decembro de 2020, ante a falta de diálogo da compañía e os “incumprimentos continuados do convenio das traballadoras”, o que provocou “incontábeis queixas e demandas do persoal”.
Finalmente, a folga desconvocouse un para de días antes de comezar, despois de que Acciona se sentase a negociar co comité e acordasen o reforzo dos cadros de persoal e a modificación dos ratios nas quendas de mañá, tarde e noite.
