Earth Sight vincula Inditex e H&M á deforestación ilegal, ao roubo de terras, á corrupción e á violencia
"As multinacionais da moda Inditex e H&M están vinculadas á deforestación ilegal, ao roubo de terras, á corrupción e á violencia. Todo ocorre nas plantacións de algodón no Brasil", destaca o activista de Ecoloxistas en Acción Tom Kucharz en base ás conclusións da nova investigación de Earth Sight titulada Crimes de moda.
Durante un ano Earth Sight investigou imaxes de satélite, sentenzas xudiciais, rexistros e de forma encuberta en feiras comerciais para rastrexar o algodón exportado desde o Brasil até os fabricantes de roupa en Asia que proporcionan os produtos dos dous maiores comerciantes polo miúdo de moda do mundo.
"Para 2030, espérase que Brasil supere aos Estados Unidos como o maior exportador de algodón do mundo. Propiedade dalgunhas das familias máis ricas do Brasil, as plantacións agrarias industriais investigadas están entre os maiores produtores de algodón do país", prosegue Kucharz.
Earth Sight identificou dúas empresas, Grupo Horita e SLC Agrícola, entre os maiores produtores e exportadores de algodón do Brasil. "Teñen un longo historial xudicial, con sentenzas por corrupción e multas relacionadas coa talla de 100.000 hectáreas de áreas naturais", destaca o activista.
O avance da agroindustria de algodón e soia está a desprazar ás comunidades tradicionais. Hai corrupción, violencia e impunidade. Roubáronse terras públicas e desposuído ás comunidades locais. As comunidades que viviron en harmonía co Cerrado durante séculos son expulsadas, perden os seus medios de subsistencia, están sometidas a vixilancia, intimidación e roubo de gando por parte de pistoleiros, que dispararon contra líderes comunitarios.
"E onde se produce o algodón investigado? No Cerrado, un bioma ou unha ecorrexión que cobre unha cuarta parte do Brasil e alberga 5% de todas as especies do mundo, incluídos o oso formigueiro xigante e o armadillo xigante", salienta. Nesta zona, en 2023, "a deforestación aumentou 43% respecto ao ano anterior", agrega.
A destrución do Cerrado xera impactos climáticos equivalentes a 50 millóns coches máis nas estradas cada ano, estima o propio goberno brasileiro. Por este motivo, "centos de especies enfróntanse á extinción debido á perda de hábitat causada pola agroindustria da soia e do algodón", sostén Kucharz.
"Así mesmo, cada ano, miles de millóns de litros de auga desvíanse cara a campos de algodón que, á súa vez, son asperxidos con 600 millóns de litros dos pesticidas máis perigosos e velenosos, enfermando ás comunidades e contaminando á auga e o solo", acrecenta o ecoloxista.
"A agricultura industrial e intensiva é o maior impulsor da deforestación e a degradación forestal a nivel mundial e no Brasil. En termos de presión derivada do consumo da Unión Europea, os téxtiles ocupan o segundo lugar despois do consumo de alimentos", lembra Kucharz.
Desde a chegada de Luiz Inácio Lula da Silva á Presidencia, o Goberno do Brasil comezou a tomar medidas contra a deforestación. Esta mesma terza feira, o líder do Executivo brasileiro anunciou o novo programa para enfrontar esta problemática.
Better Cotton (BC)
A raíz destas pesquisas, "a certificadora Better Cotton foi denunciada polo lavado de imaxe verde ou ecopostureo, segredo e falta de protección dos dereitos humanos. BC dixo que lanzou unha investigación en resposta aos achados de Eath Sight", revela o activista. "A maioría dos produtos de HM e Zara están fabricados con algodón BC, o que les converte nos maiores usuarios do selo fraudulento", salienta.
"Eath Sight rastrexou 816.000 toneladas de algodón desde os predios investigados no Brasil até oito empresas asiáticas que enviaron polo menos 20 millóns de pezas e artigos do fogar ás tendas de H&M ou Zara, Bershka, Pull&Bear, entre outras, no Estado español", explica.
"Zara e as marcas propiedade de Inditex, con máis de mil tendas en España, xeraron 26% dos beneficios globais destes provedores en 2023, o que converte o Estado español no destino máis importante do algodón do Brasil", conclúe Tom Kucharz en base ás conclusións da nova investigación de Earth Sight.
Inditex emitiu unha carta pública pedindo explicacións á certificadora do algodón BC. "A carta de Inditex non socava de ningún modo as nosas conclusións. Ao contrario, indica que Inditex está de acordo connosco en que este algodón de Baía nunca debería ser certificado. Pero tamén mostra como fallou Inditex", remata Earth Sight.