A Asociación pola Defensa da Ría (APDR), que fai parte da Comisión de Seguimento da Illa de Tambo desde a súa constitución, vén defendendo a necesidade de dar prioridade a súa defensa ambiental, vía adoptada por unanimidade no seo da comisión desde o momento que se aprobou o traspaso da titularidade da illa ao Concello de Poio, comarca de Pontevedra.
Así pois, indica a asociación nun comunicado, “consideramos fundamental continuar coa ruta establecida colectivamente e formalizar a creación dunha ENIL (Espazo Natural de Interese Local) para Tambo”, unha figura de protección que “blinde esta xoia da nosa ría contra accións que degraden a súa maltratada singularidade, e evitar así usos indebidos que poidan entrar en colisión co espírito do prego de condicións de cesión de titularidade asinado entre a Escola Naval e o Concello”.
“Na APDR estamos convencidos de que a ENIL potenciará a Illa coma un espazo natural único, posibilitará a recuperación dun ecosistema hoxe ocupado polo eucalipto ou a acacia, e favorecerá o deleite, a observación e a aprendizaxe da natureza, deixando a acción humana nun segundo plano e, en todo caso, aprendendo dos usos tradicionais que a veciñanza de Combarro daba a Illa para sacar sustento alimentario da terra e do mar, sen alterar a súa conservación ambiental e paisaxística”.
Neste sentido, acrecentan, “non entendemos os titubeos observados agora na Comisión, que semella deixar nun segundo plano a creación da ENIL para potenciar un Plan de Usos no que, ao noso entender, existen propostas (é o caso das instalacións hoteleiras…) que entran en contradición con esta protección ambiental que reivindicamos e cos criterios establecidos no momento da cesión ao Concello”.
Na APDR indican que a figura xurídica da ENIL obriga a tomar medidas de conservación e protección de hábitats naturais, “uns hábitats que a día de hoxe están ameazados, entre outras cousas pola contaminación procedente do emisario de Ence, emprazado nas inmediacións da illa e que impide a aplicación dunha figura de protección de rango superior; e sabemos tamén que a Xunta da Galiza debe dar a conformidade a esta ENIL e decidir sobre a súa conformidade ou rexeitalo e optar pola continuidade da degradación da nosa illa. Agardemos que, nesta ocasión, aposte pola defensa do interese común fronte á defensa dos intereses particulares dunhas poucas persoas”.
A Illa de Tambo foi propiedade do Mosteiro de Poio até as desamortizacións de Mendizábal nas que pasou de maneira "indivisíbel" a mans do pobo de Combarro. Unha "longa historia de cacicadas", explicaba hai anos o fotógrafo e veciño de Marín Antonio Costa, en conversa con Sermos Galiza, levaríana a ser propiedade do político Montero Ríos, xunto con Francisco Arosa, alcalde de Poio e o notario pontevedrés, Valentín García Escudero. Posteriormente sería cedida por estes tres ao Ministerio de Defensa para a construción dunha prisión que nunca chegou a edificarse e, de novo a Montero Ríos quen a cedería finalmente á Armada, entidade que a controla "en réxime de usufructo" até a súa cesión hai pico ao Concello dePoio.