CXPX: un poder xudicial empeñado en frear os avances sociais

O Consello Xeral do Poder Xudicial (CXPX) vén de aprobar un informe sobre a Lei de familias no que "alerta" que os tipos de familias recollidos na proposta lexislativa xeran "confusión, inseguridade e desigualdade" ao recoller un concepto de familia que inclúe as monomarentais, monoparentais, mozas, LGBTI, reconstituídas, residentes no medio rural, interculturais, migrantes, de feito, transnacionais… Sinala, ademais, que a proposta supera o marco constitucional e pode resultar en discriminacións para algúns modelos familiares. Non é novidade que o CXPX español cuestione nos seus informes determinados avances lexislativos en materia de dereitos sociais, nomeadamente nos relacionados coas mulleres e o colectivo LGBTI. A composición deste órgano xudicial está en mans das maiorías parlamentarias das Cortes españolas (10 vogais escollidos polo Congreso e 10 polo Senado), maiorías que fan uso deste organismo para os seus intereses ideolóxicos. Hoxe en mans conservadoras, o CXPX é unha ferramenta da dereita para tentar frear os avances sociais e a conquista de dereitos. Aborto En decembro de 2022, emitían un informe en relación á Lei orgánica de saúde sexual e reprodutiva con críticas a modificacións como devolver o dereito á interrupción voluntaria do embarazo de mulleres de 16 e 17 anos que na reforma de 2014 pasaron a requirir consentimento paterno/materno ou a entrega de información na consulta na que se obriga ás mulleres a agardar tres días para ratificar a decisión de interromper un embarazo, introducidas na reforma da Lei do aborto (2010) feita por Gallardón en 2014. Críticas sustentadas en vaguidades como que a proposta "non explicaba de forma convincente as modificacións introducidas no modelo vixente" ou directamente paternalistas como que as mulleres deben recibir información sobre maternidade cando manifestan querer interromper un embarazo. No caso dos tres días de reflexión, que no anteproxecto de lei se suprimiron, o CXPX sinalaba que a "infantilización" das mulleres non poder ser un argumento para eliminalos cunha explicación infantilizadora na que di que o período de reflexión é "necesario en orde a unha adecuada formación da vontade e a adopción dunha decisión consciente e meditada sobre a interrupción voluntaria do embarazo e das consecuencias, de toda orde, que a decisión comporta". Lei trans O informe elaborado polo CXPX para o Anteproxecto de lei para a igualdade real e efectiva das persoas trans e para a garantía de dereitos LGBTI (chamada Lei trans) centraba as críticas na negación do dereito de autodeterminación de xénero para as persoas menores de 18 anos. Malia recoñecer que é lexítimo concederlles a mudanza rexistral, aluden ao "principio de especial protección do menor" para negarlles un dereito que de facto xa tiñan antes da aprobación desta lei, ratificado, ademais, en numerosas sentenzas non só en persoas de entre 16 e 18 anos, senón en idades moito máis temperás. O que máis preocupa ao CXPX é que sexan os denunciados por delitos sexuais quen deban probar que existiu consentimento A esta discusión engade un argumento empregado posteriormente no debate público para cuestionar esta lei como é a discriminación das mulleres no deporte, reproducindo estereotipos sexistas sobre a condición física e a supremacía dos corpos masculinos sobre os femininos sen distinción algunha entre o deporte profesional e outras prácticas deportivas. Liberdade sexual No caso do informe emitido polo CXPX sobre o anteproxecto de Lei Orgánica de Garantía Integral da Liberdade Sexual, coñecida popularmente como 'lei do só si é si', a maior crítica céntrase na definición de consentimento. O que máis preocupa ao CXPX é que poida darse unha inversión da carga da proba e que sexan os denunciados por delitos sexuais e a súa defensa quen deba probar que existiu consentimento e non o que viña pasando até o de agora, que era a vítima, en exclusiva, quen tiña que demostrar non só que non existiu consentimento senón como e en que medida se resistiu e se opuxo ao acto. A isto respostou o Consello Fiscal explicando que a proposta "en modo algún se traduciu nunha inversión da carga da proba ou nunha vulneración do principio de presunción de inocencia, dado que seguirá correspondendo á acusación acreditar que non houbo actos externos, concluíntes e inequívocos que implicase un consentimento". En contraposición coa resistencia aos avances sociais e de dereitos das mulleres o que si apoia o CXPX é a mercantilización do corpo das mulleres e xa en xullo de 2020 concedía o permiso de paternidade a un xuíz tras o "nacemento" dun fillo por ventre de aluguer.