Concentración en Lugo en solidariedade coas persoas sancionadas por protestar contra Israel na Volta ciclista
Verciñanza de Lugo recibe notificacións d sancións de 300 euros por protestar contra Israel no transcurso daquela carreira.
Unha concentración esta cuarta ante a Subdelegación do Goberno español en Lugo denunciou a represión das accións de solidariedade con Palestina durante a Volta ciclista do ano pasado e para exixir a inmediata derrogación da lei mordaza.
A mobilización, convocada pola CIG e na que estivo o seu secretario xeral, Paulo Carril, desenvolveuse coincidindo coa chamada a declarar por parte da Subdelegación de dúas testemuñas, dentro do proceso de instrución da sanción administrativa que lle foi proposta ao secretario comarcal da CIG, Lois Neto, por feitos acontecidos na Fonsagrada durante a etapa da Volta ciclista.
"Múltanme con 300 euros", apunta Neto a Nós Diario, "por desacato á autoridade e delito de odio, cando non fixen nada. Identificoume [a Garda Civil] por cruzar a estrada por onde ía ir a carreira unha hora antes de que pasase", afirma. 13 persoas foran detidas ou identificadas durante a etapa da Volta entre O Corgo e Monforte por protestar contra a presenza do equipo Israel-Premier Tech. Detencións, identificacións e sancións que tamén se deron en días seguintes noutras etapas da Volta ciclista pola Galiza.
Estas 13 persoas expóñense a sancións que poderían sumar até 65.000 euros por manifestarse en contra da participación do equipo israelína proba ciclista. Oito das 13 xa están nun proceso xudicial acusadas de desordes públicas.
Lei Mordaza
Neto denuncia a "dobre cara" do Goberno español, "por gabarse de solidariedade con Palestina ao mesmo tempo multar e deter xente que protestaba contra o xenocidio". A isto engade que para levar acabo esas "represalias" o Executivo estatal válese da coñecida como Lei Mordaza.
Neste sentido, a CIG denunciou esta cuarta feira a "absoluta incapacidade e falta de vontade política do Goberno español para cumprir coa súa promesa de derrogar esta norma". Lonxe de avanzar na recuperación de dereitos democráticos, afirma, "mantense en vigor un marco legal que permite sancionar a protesta e reprimir a mobilización social".
