Veciñanza de Lugo recibe as multas polas protestas contra Israel na Volta ciclista
Veciñanza de Lugo está a recibir estes días escritos da Subdelegación do Goberno español notificándolles multas de até 300 euros pola súa participación nos actos de rexeitamento ao xenocidio en Gaza durante o paso pola Galiza da Volta ciclista, o pasado mes de setembro.
Un dos veciños que recibiu esta notificación é Lois Neto, que explica a Nós Diario a súa intención de recorrer a multa. Neto estaba o 9 de setembro na Fonsagrada (comarca homónima) para protestar ao paso da proba ciclista. "Identificoume un garda civil que me dixo que me ía propor para unha sanción", indica.
"Penduramos un bandeirón grande coa bandeira palestina perto do cuartel da Garda Civil, que está nun edificio do Concello, e pedíronnos [os garda civís] que a sacásemos". Posteriormente, indica Nieto, "preguntei a un dos gardas civís se onde remataba o cordón de seguridade podía cruzar a estrada. Cando fun cruzar, identificáronme e dixéronme o da sanción".
Este veciño apunta que nestes días hai máis xente a recibir propostas de sanción, tamén polas protestas que decorreron en Mos (comarca de Vigo).
Por outra parte, Lugo acollerá esta sexta feira a gala solidaria 'As 13 de Lugo', coa que se pretende recadar fondos para custear as multas ás que se enfrontan os cidadáns que foron detidos o pasado mes de setembro nas protestas contra o xenocidio en Gaza ao paso da Volta polo Corgo (comarca de Lugo) e en Monforte (Terra de Lemos).
Estas 13 persoas expóñense a sancións que poderían sumar até 65.000 euros por manifestarse en contra da participación do equipo israelí Premier Tech —agora NSN Cycling Team— na proba ciclista. Oito das 13 xa están nun proceso xudicial acusadas de desordes públicas.
