Os concellos síntense "afogados" pola carencia de recursos para a atención á dependencia

O presidente da Federación Galega de Municipios e Provincias (Fegamp), Alberto Varela, mantivo esta segunda feira unha reunión coa responsábel da Consellaría de Política Social, Fabiola García, na que lle puido trasladar a preocupación dos municipios pola falta de fondos para o servizo de axuda no fogar.

Varela demandou unha achega maior de fondos para atender á veciñanza maior ou dependente e paliar a “asfixia” económica na que se ven os concellos en plena crise da Covid-19.

A presión asistencial aumenta, mais de momento non o fixeron os cartos. “Trasladeille á conselleira o afogados que estamos os concellos galegos cun recurso que é fundamental para atender aos nosos maiores e aos nosos dependentes”, aclarou Varela.

Os custos extra están “sobrecargando” os plans orzamentarios locais e tanto pequenos como medianos municipios “non van ser quen de facer fronte a esa situación” por moito máis tempo. O representante comentou que, por exemplo, teñen máis tarefas como poden ser o reparto de comida e fármacos á veciñanza, a necesidade de cubrir produtos básicos polos despedimentos...

A este respecto, Varela lamentou que as administracións locais sexan as que teñen máis carga económica. “Se os prezos de licitación están arredor de 16 euros a hora, os concellos poñen 7, somos a administración que máis diñeiro aporta”, subliñou.

Ante as súas peticións, a conselleira Fabiola García recoñeceu que hai que facer “unha actualización da axenda social única” adaptada á pandemia e dixo que estudará a achega dun maior investimento desde a Xunta.

No entanto, García -e tamén Varela, en parte- defendeu que igualmente ten que aumentar a contía que chega desde o Goberno do estado español.