“É inadmisíbel a opinión verquida na columna de El Correo Gallego Que din os rumorosos asinada por Antón Trabanca”, di a representación dos traballadores na súa nota, “en que sementa dúbidas sobre se se están a producir 'pequenas sabotaxes nos telexornais da TVG por persoas dispostas a todo”.
El Correo Gallego, rotativo moi achegado ás posicións do PP e do Goberno de Alberto Núñez Feixóo, publica estas insinuacións nun contexto de forte contestación interna nos medios públicos a causa da manipulación informativa e o férreo control do labor dos profesionais exercido pola dirección. De feito, o cadro de persoal respaldou este 5 de outubro o viséximo #VenresNegro, en que os empregados da CRTVG visten de negro en protesta pola situación.
“O columnista aparenta descoñecer o contexto de fonda mudanza tecnolóxica polo proceso de dixitalización que está a acometer a televisión pública estes días”, engade o comité. Nunha recente entrevista con Sermos Galiza, así o lembraba o presidente do órgano dos traballadores, Raimundo Méndez.
“Esta provocación responde aos intereses de quen, desde a súa posición de poder, non tolera a demanda duns medios públicos independentes e ao servizo de todos os galegos e galegas”, expón o comunicado, que remata coa esixencia ao director xeral da compañía, Alfonso Sánchez Izquierdo, “dun desmentido público desta grave difamación que atenta contra a dignidade dos e das profesionais dos medios públicos de Galiza”.