CIG, STEG e Asembleas Abertas convocan unha folga para o 28 de abril pola "defensa do ensino público"

As organizacións sindicais CIG-Ensino, STEG e Asembleas Abertas do Ensino Público anunciaron onte en rolda de prensa unha folga e unha manifestación para "a defensa do ensino público", prevista para o 28 de abril en Compostela, con saída da Alameda. Con esta mobilización preténdese "forzar" a Consellaría de Educación a unha "negociación sobre as condicións de traballo das docentes dos centros públicos galegos".

"Queremos visibilizar esta problemática. O conselleiro Román Rodríguez non quere sentar a negociar, senón que levan a cabo manobras desmobilizadoras que combatemos desde sindicatos e asembleas", sinalou a secretaria nacional da CIG-Ensino, Laura Arroxo. "Falamos de ratios, do horario lectivo, de precariedade ou atencións a diversidade, onde máis coxea o ensino público", engadiu a docente.

Desta maneira, convidan a todo o persoal do ensino de todos os niveis educativos. Ao mesmo tempo, os sindicatos anunciaron un calendario de mobilizacións "deslocalizadas en varias comarcas e vilas do país para seguir coa loita".

Longo percorrido

CIG-Ensino, que representa a maioría do profesorado galego, e STEG iniciaron a comezos deste curso mobilizacións para reclamar "a recuperación dos dereitos que o corpo docente galego tiña alcanzado antes da crise", así como a adecuación das condicións de traballo ao contexto social e educativo actual.

Estas mobilizacións foron a continuidade das que xa encetaran como resposta ao acordo sindical coa minoría da Mesa Sectorial en outubro de 2023. "Estamos, por tanto, nunha loita de longo percorrido na que o futuro do ensino público e a defensa do profesorado se ten colocado no centro do debate", denunciaron desde os sindicatos.

Durante este curso, CIG-Ensino e STEG convocaron cinco xornadas de folga que estiveron acompañadas doutras accións como feches en distintos centros educativos do país e numerosas manifestacións en diferentes cidades e vilas galegas.

Ao tempo, "o evidente descontento" respecto das condicións dos centros públicos, "levou o profesorado a organizarse en asembleas", aparecendo un novo actor que aglutina desde "a pluralidade e a horizontalidade a acción directa" das profesionais da educación, que son as Asambleas Abertas do Ensino Público.

"Malia que o conselleiro se aferre a este acordo da miseria como única maneira de negociar, fomos atopando unha reposta no profesorado moi importante", sinalou en rolda de prensa a portavoz de STEG, Comba Campoi. Nesta mesma liña, Ana Cabanelas, das Asembleas Abertas do Ensino Público, destacou a importancia de xerar acción e mobilización a través das asembleas. "Son un novo actor que aglutina a acción directa", destacou.

"Sen resposta"

Durante a rolda de prensa, os sindicatos denunciaron que o conselleiro "négase rotundamente a recibirnos e a escoitar as nosas demandas", destacou Arroxo. "Anpas de moitos centros pediron reunións tamén, e non está escoitando o sentir maioritario do profesorado", engadiu a secretaria nacional da CIG-Ensino.

Concentración polo "deterioro" e "abandono" educativo

A CIG-Ensino vén denunciando unha situación de "deterioración estrutural" e "abandono" en centros educativos da Coruña por parte da Consellaría de Educación, e convocou para mañá, 18 de marzo, unha concentración fronte á Dirección Territorial da Consellaría correspondente na cidade herculina.

Instan a Xunta a dedicar "de maneira inmediata" o orzamento "necesario" para solucionar as "deficiencias estruturais máis urxentes" que "afectan á seguridade e á saúde", así como a que "sexa transparente co calendario de obras pendentes". "Animamos a toda a comunidade educativa a participar nesta reivindicación", sinalaron nun comunicado. Denuncian pingueiras, instalacións eléctricas "obsoletas, deficientes e perigosas", e sistemas de calefacción "anticuados".