A CIG, CCOO e UXT mostran o seu rexeitamento ao novo proxecto para a Mina de Touro O Pino

A Confederación Intersindical Galega (CIG), Comisións Obreiras (CCOO) e a Unión Xeral de Traballadores (UXT) reafirmaron a súa postura contraria ao proxecto para a mina de Touro O Pino.

Segundo sinalou a Plataforma Veciñal Mina Touro O Pino Non nun comunicado, o tres principais sindicatos galegos, "que representan unha proporción amplísima dos traballadores galegos e que coñecen a realidade laboral", rexeitaron "transversalmente" o proxecto.

"Non se deixan engatusar polas promesas das empresas mineiras que mutan, cunha facilidade abraiante, de centos en miles os postos de traballo que din van crear. Proxectos como este non encaixan na súa aposta por unha minaría sustentábel e de recuperación dos espazos naturais, por moito que as mineiras usen profusamente eses termos no seu discurso dunha forma espúrea", incidiron no comunicado.

A plataforma explicou que, a finais de setembro, a Cámara Oficial Mineira da Galiza, Minaría Sostíbel de Galiza e EIT Raw Materials, coa colaboración da Xunta da Galiza, realizaron na cidade da Cultura, en Compostela, as xornadas "Minerais estratéxicos para a industria galega", que buscaba reflexionar acerca da crise de materias primas estratéxicas, que indicaban, "tamén afecta a Galiza, con paróns e grandes problemas de subministración en sectores chaves para Galiza, como son a automoción, o naval, o sector do TIC ou a metalurxia".

Con todo, indican, segundo os datos da Estatística Mineira publicados polo Ministerio de Transición, no 2019 (último ano dispñíbel), o Estado español sitúase nos primeiros postos entre os países produtores de cobre a nivel europeo. "Pero unha parte moi importante dese cobre destínase á exportación", lembran.

"Queda claro que os problemas de abastecemento das compoñentes que precisa o naval, a automoción... non están ligados á capacidade de producir o cobre, senón á de transformalo. Producimos cobre que se exporta, e recompramos compoñentes manufacturadas, un negocio suculento", destacaron.

"Estupor"

É por este motivo que recibiron "con estupor" o resumo do acontecido por parte da Xunta da Galiza, que indicou que "sindicatos, empresas e Administración coinciden en explotar os recursos minerais propios para frear a crise".

"A necesidade de mover a opinión pública cara a posicións favorábeis a proxectos mineiros leva a presentar a realidade baixo estas bastas manipulacións. O apoio que tivemos da base social traballadora foi rotundo cando a empresa promoveu o proxecto mineiro presentado en 2017 e denegado en 2021", lembrou a Plataforma.

"Coa fin de solicitar o pulso do tres sindicatos maioritarios na Galiza ante a eventual presentación dun novo proxecto mineiro", a Plataforma mantivo reunións co Secretario Xeral de Santiago-O Barbanza de CCOO, co Secretario Xeral da CIG e coa Secretaria Xeral de Compostela-O Barbanza e o Secretario de Política Sindical da UXT.

Após as xuntas, a asociación veciñal recibiu "de novo unha mensaxe clara: non cambiaron a súa opinión e manteñen a súa posición, moitas veces expresada, de oposición rotunda á reapertura e ampliación da Mina de Touro O Pino".