Catro persoas resultaron feridas tras unha colisión na cal se viron implicados tres vehículos en Ribeira (comarca do Barbanza), segundo informaron fontes do CIAE 112 Galiza.
O accidente ocorreu sobre as 22.45 horas na estrada AC-550 á altura de Oleiros, e o 112 tivo constancia a través dun aviso de Urxencias Sanitarias 061.
Aínda que un dos vehículos implicados na colisión envorcara, todas as persoas feridas estaban liberadas e accesíbeis á chegada dos servizos de Emerxencias.
O CIAE 112 informou os bombeiros de Ribeira, a Garda Civil de Tráfico, a Policía Local e aos operarios de mantemento da estrada.
Os catro feridos foron evacuados polos servizos sanitarios e os bombeiros procederon á limpeza da vía.
Accidente de moto
Por outra parte, o 112 tamén informou dun accidente ocorrido no quilómetro 16 da AC-151 na parroquia de San Fiz, en Monfero (comarca do Eume).
O sinistro ocorreu o domingo, cando un motorista saiu da vía nunha curva e chocou contra unha árbore, e o 112 avisou a Urxencias Sanitarias da Galiza-061, que mobilizou o helicóptero medicalizado con base en Santiago.
O CIAE tamén informou a Garda Civil de Tráfico, aos bombeiros do Eume e aos servizos de mantemento da vía.
