Caballero evita tratar os colapsos no tráfico da cidade mentres celebra o "cheo apoteósico" da fin de semana

O alcalde de Vigo, Abel Caballero, celebrou esta segunda feira o "cheo apoteósico" rexistrado a pasada fin de semana na cidade, coa chegada de millares de persoas e o "cento por cento" de ocupación en estabelecementos hostaleiros, aínda que sen facer referencia aos problemas de tráfico derivados desa afluencia masiva de visitantes.

Nun audio gravado e remitido aos medios, o rexedor olívico subliñou que a campaña do Nadal da cidade "está a ser excepcional" e recalcou que o nivel de ocupación dos aloxamentos a pasada fin de semana foi de "100%".

Nese sentido, explicou que o volume de visitas foi "grandioso", e foi raro o concello galego que non organizase excursións a Vigo. A iso hai que sumar a chegada de "decenas de miles" de cidadáns portugueses, tendo en conta que a pasada sexta feira foi feriado en Portugal.

Así, Caballero celebrou o "cheo apoteósico" en hoteis e restaurantes, "os comercios vendendo" e a grande afluencia nas atraccións e actividades deste "Nadal excepcional". "Todo o mundo quere ser Vigo", proclamou.

Sen referencias ao tráfico

O alcalde, con todo, non fixo referencia aos problemas de tráfico que, sobre todo a sexta feira, colapsaron os accesos á cidade (e que, por exemplo, obrigaron a suspender un acto coa ministra Pilar Alegría, porque quedou 'atrapada' no atasco), e provocaron escenas xa vividas o ano pasado, de grandes colas en viais do centro urbano, ou vehículos aparcados nos accesos do túnel do Beiramar.