A Dirección Xeral de Emerxencias e Interior da Vicepresidencia Primeira da Xunta da Galiza activou a alerta laranxa para esta segunda feira por temporal costeiro en todo o litoral galego.
Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde primeiras horas da mañá no noroeste e oeste do litoral do noroeste e na Mariña e, pola tarde, estenderase ao litoral suroeste da Galiza. Desta forma, espérase mar combinado do noroeste con ondas de até seis metros, que poden alcanzar os sete metros entre Ortegal e Estaca de Bares.
Xornada do domingo
Na xornada deste domingo estivo activada a alerta amarela por temporal costeiro e a situación no mar foi empeorando ao longo da xornada. O aviso de nivel amarelo do domingo deixou ventos de forza oito de 50 a 61 quilómetros por hora entre Fisterra e Sisargas, entre Ortegal e Bares e mar dentro.
Ademais, de forma ocasional, puideron darse ventos no mar de 74 quilómetros por hora e mar combinado de oeste aumentando a ondas de cinco metros e rolando ao noroeste.
