Adega pide paralizar o parque eólico Ruña II polos danos a un "patrimonio xeolóxico único"
A Asociación para a Defensa Ecolóxica da Galiza, Adega, advirte dos posíbeis danos que as obras do parque eólico Ruña II, que están a desenvolverse nos montes da Ruña, concello de Mazaricos (Xallas), estarían a causar sobre o patrimonio natural, e en particular, sobre hábitats prioritarios e singulares elementos xeomorfolóxicos relictos do glaciarismo non contemplados na Declaración de Impacto Ambiental (DIA).
A entidade ecoloxista apunta que a ampliación da pista de acceso aos muíños AR-4 a AR-7 atinxiu unha zona con matogueira higrófila e turbeiras arredor do nacemento e a canle do Rego da Ribeiratorta. Neste hábitat concreto identifica breixeiras húmidas atlánticas con E. ciliaris e E. Tetralix, turbeiras altas activas e turbeiras altas degradadas que poden rexenerarse de xeito natural.
"Dáse a circunstancia de que estes impactos non foron contemplados na DIA debido ás carencias e omisións na avaliación ambiental deste proxecto", afirma Adega nun comunicado no que denuncia o despece irregular deste proxecto, o Ruña II, promovido por Eurus Desarrollos Renovables, S.L.U., co Ruña III, actualmente paralizado de forma cautelar polo TSXG, e cuxa liña eléctrica de evacuación está en fase de execución.
Adega tamén alerta de que "nun ámbito xeográfico máis amplo, as obras deste parque eólico –explanacións, pistas e gabias– atinxiron elementos xeomorfolóxicos singulares relacionados co antigo glaciar rochoso da Ruña, recentemente descrito polo profesor Vidal-Romaní.
Un espazo único
Segundo alerta a asociación ecoloxista o glaciar rochoso da Ruña inclúe dous elementos asociados que forman parte desta xeoforma e está constituído polo nicho de nivación, que comezaría en Chan da Ruña no mirador Alto da Ruña, até chegar ao fin da zona denominada Alto das Barreiras. "Ao sur estaría o lombo rochoso que comeza no vértice xeodésico até o chamado Castelo Grande. Esta aliñación marcaría a zona de maior acumulación de xelifractos existente na zona".
Este conxunto formado polo nicho de nivación e os campos de xelifractos forman o chamado glaciar rochoso da Ruña, único en toda a costa galega, "cuxa entidade debería ser preservada en toda a súa integridade xa que constitúe unha formación xeolóxica de máis de 100.000 anos que ten un excepcional interese científico para a xeoloxía da Galiza", defende.
Neste sentido, avisa dunha perda irreparábel. De se manter a actividade no parque os danos agravarían a conservación da contorna e "os proxectos de centrais de bombeo sobre a mesma zona eliminaría definitivamente unha parte importante do noso patrimonio xeolóxico".
Co obxectivo de evitar máis estragos, Adega vén de solicitar á Dirección Xeral de Patrimonio Natural que, "se decrete a paralización das obras do parque eólico Ruña II coa fin de preservar os elementos naturais descritos e se inicie un procedemento para a declaración deste espazo – montes e glaciar rochoso da Ruña– como protexido, ben como ampliación da ZEC Carnota-Monte Pindo ou ben como Monumento Natural ou Paisaxe Protexida"; en aplicación do artigo 46 da Lei 5/2019, do 2 de agosto, do patrimonio natural e da biodiversidade da Galiza.
