O Concello de Mazaricos explicou esta segunda feira nun comunicado que "continúa a defender os intereses da veciñanza ante o proxecto de sete novos parques eólicos no municipio". O alcalde, Juan Blanco, do BNG, sinalou "que a proliferación de novos proxectos é preocupante debido á localización dos mesmos, xa que afecta tanto a terras de cultivo, ao Camiño de Santiago ou mesmo a núcleos de poboación".
O rexedor sinalou que “os usos económicos e sociais do solo non se están tendo en conta á hora de autorizar novos parques no noso municipio”. Por parte do Concello, sinalou Blanco, “non podemos permitir que dúas das fontes de riqueza do municipio, como son o sector agrogandeiro e o turístico, se vexan afectadas por priorizarse unha actividade económica que non ten unha achega directa comparábel á economía local e vén cargada de externalidades”.
Actualmente, están en fase de tramitación sete parques, incluíndo A Picota I e II, Alvite I e II, O Vao e San Cosmeiro. "Se no pasado os parques eólicos adoitaban situarse no alto dos montes e en áreas despoboadas, con poligonais de pequeno tamaño, este non é caso destes proxectos", afirma o comunicado do municipio mazaricán.
"Os novos parques situaranse en zonas habitadas, sobre terreos de uso social e económico e con liñas de evacuación que afectan gravemente á contorna", continua. “Preocúpanos que, ademais, este nivel de ocupación do territorio nin sequera se xustifique desde o punto de vista da produción enerxética, cuxo nivel non será moi alto”, engade o alcalde.
Fronte a estes proxectos, o Concello de Mazaricos salienta "o retorno económico que o parque A Ruña significará para as comunidades veciñais grazas a unha negociación exitosa coa empresa promotora".
"A Xunta non incentiva a participación veciñal"
O portavoz do Observatorio Eólico da Galiza, Xavier Simón, lembra que "o modelo eólico da Xunta da Galiza non incentiva a participación veciñal nin a compensación económica das comunidades afectadas". A maior parte das rendas dos concellos e comunidades locais, lembra o experto, “derivan das negociacións cos promotores, que adoitan ser grandes empresas con capacidade persuasiva”. Como resultado, as rendas medias obtidas pola instalación destes parques "son decote reducidas".
Porén, o portavoz do Observatorio Eólico salienta que "este non foi o caso en Mazaricos". O Parque Eólico A Ruña ten en termos de renda anual para a veciñanza, e froito da negociación dos actores locais mazaricáns, como o Concello, coa empresa promotora, "un pagamento anual por megawatt que multiplica por 2,5 o valor medio na Galiza.
De feito, "tendo en conta que moitos parques se negocian por moito menos, cremos que no caso da Ruña pode ser unha renda catro veces superior a de moitos outros parques da Galiza”, engade. Froito desas negociacións, unha vintena de asociacións locais recibirán 72.000 euros anuais durante 30 anos.
O caso de Mazaricos demostra, a xuízo de Xavier Simón, “que hai marxe nas empresas para deixaren máis rendas no ámbito local”. O experto considera Mazaricos “exemplo disto” e considera que “os responsábeis da negociación fixeron un moi bo traballo”. Así, o do Parque Eólico a Ruña en Mazaricos constitúe “un caso único en toda a Galiza”, destaca.
Nace unha plataforma en defensa da Ruña
Por outra parte, a plataforma Salvemos A Ruña vén de ser constituída para defender este cumio, "o máis alto da Costa da Morte", dun novo proxecto hidroeléctrico que está a proxectar a empresa Xeal.
A vocal do colectivo, Francesca Valle, explicou a Nós Diario que solicitan ao Concello de Mazaricos e a Xeal "unha reunión para que expliquen ben e con claridade como vai ser o proxecto e a realidade da súa afectación".
