Un home faleceu esta segunda feira na Coruña a consecuencia dos disparos de axentes da Policía Nacional debido, fontes próximas ao caso, a altercados previos protagonizados por un home negro, cubano, de 35 anos e de gran complexión.
Segundo as fontes citadas por Europa Press, no enfrontamento, que tivo lugar no polígono coruñés de Agrela, antes das 10.30 horas, o falecido, que estaba a ser perseguido polo dispositivo policial, trataría de agredir un axente da Policía Nacional cunha barra de ferro coa que, minutos antes, tería golpeado coches estacionados na avenida de Arteixo.
Os axentes trataron de reducir o home, que se amosaba "moi agresivo" cunha pistola eléctrica taser, mais non o conseguiron e un dos axentes, que se atopaba no chan, disparou este cidadán e matouno.
O Sindicato Unificado de Policía, de tendencia ultraespañolista, cualificou o home, de 35 anos, de "delincuente". Polo momento, a Policía Nacional non confirmou oficialmente nada, ao igual que o Ministerio do Interior.
