As reclamacións da veciñanza de Moaña a prol dunha sanidade de calidade non dan tregua. Após 20 domingos consecutivos de mobilizacións a favor da recuperación dos servizos médicos no centro de saúde, máis de 5.000 persoas manifestáronse na localidade en defensa dunha sanidade de calidade.
A alcaldesa de Moaña, Leticia Santos, sinalou ao remata da marcha a Nós Diario que “vivimos de celebrar unha manifestación con moito éxito para reclamar o que vimos demandando 20 domingos consecutivo, após uns retallos sanitarios que deixaron sen médico de referencia a máis de 2.700 veciños”.
A mobilización, convocada pola Mesa da Sanidade de Moaña, reclamou a volta das urxencias médicas á vila do Morrazo. A este respecto, Santos lembrou que “coa escusa da pandemia levaron para Cangas as urxencias argumentando que o centro de saúde de Moaña non cumpría coas condicións necesarias, porén o PAC de Cangas presenta as mesmas características técnicas”.
Urxencias en Cangas
Leticia Santos advertiu que co “traslado das urxencias a Cangas incrementáronse os tempos de resposta do servizo de ambulancias cando se require persoal médico o que provoca graves retrasos na atención”.
A rexedora de Moaña urxiu ao “reforzo dos servizos de ambulancia, xa que se deron varios casos en que a atención médica non chegou coa suficiente rapidez e isto restou oportunidades a varias persoas que acabaron perdendo a vida. Nunca saberemos se se podería ter dado un resultado diferente”
Santos asegurou que “seguiremos a convocar estas mobilizacións até que a Consellaría entenda que as nosas demandas son xustas e que o que pedimos é ter unha Atención Primaria digna e uns servizos de urxencias en Moaña”.