1.526 médicas marcharon da Galiza desde 2010 para traballar fóra do Estado español

Un médico ou unha médica formada na Galiza só precisa dun Certificado de Idoneidade Profesional para poder exercer a súa profesión fóra do Estado español. O documento é expedido polo Consello Xeral dos Colexios Médicos, atendendo as indicacións do colexio territorial do que fai parte o solicitante. A relación dos certificados de idoneidade permite coñecer o número de facultativas e facultativos que abandonan a Galiza e o Estado en cada anualidade. O Consello Xeral dos Colexios Médicos emitiu 1.526 certificados de idoneidade desde 2010 a outros tantos facultativos integrados nos catro colexios médicos existentes na Galiza. Neste sentido, entre 2010 e 2014, abandonaron o país 438 profesionais, a razón de 60 en 2010, 73 en 2011, 89 en 2012, 107 en 2013 e 109 en 2014. Precisamente, a emigración deste colectivo acelerouse ao final deste período, como consecuencia das políticas de recortes aplicadas polo Goberno galego e estatal, no marco da xestión da crise declarada en 2008. O problema agudizouse entre 2015 e 2019. Nese período, marcharon da Galiza 730 profesionais, comezando por 142 en 2015; 157 en 2016; 129 en 2017; 147 en 2018 e 155 en 2019. Malia que nas últimas anualidades comezou a evidenciarse unha recuperación da actividade económica, as limitacións á contratación no sector público aprobadas polo primeiro Gabinete de Mariano Raxoi mantivéronse, así como as políticas de axuste orzamentario aplicadas por Alberto Núñez Feixoo desde o seu primeiro orzamento en 2010. Rueda eleva o ton contra a protesta pola sanidade: "Para buses si que hai cartos" A pandemia non detivo a sangría emigratoria. En 2020, cando a totalidade das administracións competentes en materia sanitaria aumentaron o seu cadro de persoal para facer fronte ao coronavirus, 98 facultativos abandonaron a Galiza. Outro tanto aconteceu en 2021 con 159 médicas e médicos e nos primeiros seis meses de 2022, con 101 profesionais. A falta de coñecer as cifras totais para esa última anualidade, desde 2020 un total de 358 médicas e médicos víronse obrigados a marchar do país. Portugal como destino de referencia Os destinos de referencia no espazo da Unión Europea (UE) para os profesionais galegos da medicina son Portugal, Reino Unido e Irlanda. Mentres que para o conxunto estatal Francia é o primeiro Estado de elección, no caso galego o principal destino é Portugal. Nesta situación, inflúen diversas variábeis, mais, particularmente, as condicións laborais e a proximidade xeográfica. As campañas impulsadas polo Goberno galego desde 2018 para conseguir o retorno das médicas e médicos galegos, fundamentalmente de Atención Primaria, emigrados a Portugal non deron resultados. Alén das mellores condicións laborais da nación veciña, inflúe a diferente consideración social desta especialidade sanitaria entre os dous países, significándose a importancia da medicina familiar no sistema de saúde luso, até o punto de sumar 219 facultativos por cada 100.000 habitantes fronte aos 116 facultativos por cada 100.000 habitantes da Galiza. Máis de 50.000 sinaturas apoian a ILP para a reforma da Atención Primaria impulsada por SOS Sanidade As médicas e os médicos formados en Medicina Familiar e Comunitaria son os que máis emigran. A continuación, sitúanse aqueles profesionais especialistas en Anestesioloxía e Reanimación e en Pediatría. Neste caso, trátase de tres disciplinas cun importante déficit de profesionais no sistema sanitario galego, destacando Anestesioloxía e Reanimación, pola duración de catro anos do período como Médico Interno Residente (MIR). A idade media das e dos profesionais de medicina que abandonan a Galiza é moi baixa. Segundo os datos extraídos dos certificados de idoneidade emitidos polo Consello Xeral dos Colexios Médicos, destacan, por esta orde, as franxas de idade entre 31 e 35, entre 36 e 40 e entre 25 e 30 anos. Precisamente, estes datos axudan a explicar o importante envellecemento do cadro de persoal das facultativas e facultativos do Servizo Galego de Saúde (Sergas). O envellecemento O envellecemento do cadro de persoal do Sergas é un feito. Segundo as cifras achegadas polo Ministerio de Sanidade do Goberno do Estado para 2021, último ano con datos, Galiza conta con 4.501 especialistas de Medicina Familiar e Comunitaria, 2.501 dos cales desenvolven a súa actividade en Atención Primaria e os restantes noutros niveis sanitarios Un total de 1.083 médicas e médicos que desenvolven a súa actividade profesional nos centros de saúde galegos son maiores de 60 anos, representado 43,3% do conxunto do colectivo. A este respecto, as cifras procedentes do Sergas indican que 15,9% das e dos facultativos de Atención Primaria superan os 64 anos de idade, 17 deles rexistran 70 anos, 258 atópanse entre os 69 e os 66 anos e 169 teñen 65 anos. Na mesma liña, certifican que no grupo de idade de entre 63 e 64 anos atópanse o 14,4% das médicas e médicos do primeiro nivel sanitario, situándose 211 en 64 anos e 174 en 63. A sanidade galega sitúase á cola do Estado e da UE en profesionais de enfermaría O persoal médico dos centros de saúde da Galiza atópase entre os máis envellecidos do Estado. Só Castela e León presenta uns datos peores, tras superar o 49,9% dos seus facultativos de Atención Primaria os 60 anos. Nesta dirección, a porcentaxe media de persoal médico do Estado maior de 60 anos é de 33,2%, se ben en Catalunya só significa o 19,7% do total e en Euskadi 29% Máis do 50% das médicas de Primaria teñen un contrato eventual A emigración do persoal médico concrétase en dúas direccións. A un lado sitúanse aquelas persoas que abandonan a Galiza para desenvolver a súa actividade profesional no espazo comunitario. Noutro aparecen quen marchan do país para traballar noutros territorios do Estado español que ofrecen mellores condicións laborais. Neste sentido, a 1.526 facultativas e facultativos que emigraron desde 2010 para traballar fóra do ámbito estatal débense sumar aqueles que desempeñan a profesión noutras comunidades de Estado. Porén, a respecto deste último colectivo non existen cifras oficiais, malia que as fontes consultadas por Nós Diario sinalan que se trata dun grupo máis amplo que no primeiro caso. O voceiro de SOS Sanidade Pública, Manuel Martín, apunta a Nós Diario que “as causas desta emigración son moi diversas, algunhas mesmas de tipo histórico” porén pon o foco en que “as condicións laborais non son boas”. Nesta dirección, afirma que “máis do 50% dos contratos formalizados en Atención Primaria non son estábeis, coa complicación que representa para as persoas nesa situación”. Ademais, non lle sorprende “a alta demanda de médicos de familia no espazo da Unión Europea porque a formación MIR na especialidade de Medicina Familiar e Comunitaria é moi boa e goza de grande consideración fóra do Estado español”. Sexa como for, as campañas impulsadas pola administración galega para recuperar estes profesionais remataron en fracaso polas condicións laborais, sobre todo a nivel de estabilidade, da poboación galega.