Xuízo pola caixa 'b': As contas do PP de Pontevedra, no albo

Mariano Raxoi comparecerá o vindeiro 24 marzo na Audiencia Nacional para testemuñar no xuízo aberto polas obras de reforma da sede central dos populares na rúa de Génova, en Madrid. O antigo presidente do Goberno do Estado non só deberá responder sobre o presunto uso de diñeiro negro para sufragar as obras do cuartel xeral dos populares, que o actual equipo de Pablo Casado tenta sacar á venda. Ademais, Raxoi será interpelado a respecto dos sobresoldos pagados a dirixentes da formación con diñeiro negro, da súa participación nesta operativa como beneficiario e das contías recibidas dunha cantidade de presunta orixe irregular achegada en 2010 polo Partido Popular de Pontevedra. Luis Bárcenas testemuñou durante o xuízo que a caixa B se liquidou en 2009 mais que o último ingreso na mesma o efectuou en 2010 o Partido Popular de Pontevedra. Así, sinalou que "desde 2009 non se achega nin un só empresario a facer un donativo ao partido. Desde ese momento, baléirase a caixa e entrégase todo ao presidente. As entregas a Raxoi e a Cospedal realízoas eu sempre. Remátase a caixa B en 2009. O saldo estaba a cero. Hai un embargo en Pontevedra de 70.000 euros. Avisámoslles de que tiñan que devolver esa cantidade. Entréganme 50.000 euros e fago dous sobres de 25.000 euros e entrégolle un a cada un, a Mariano Raxoi e a Cospedal". A conexión de Ana Pastor O donativo do PP de Pontevedra foi confirmado na súa declaración polo xerente do PP naquel momento, Cristóbal Páez. Este recoñeceu diante do xuíz que a causa dun embargo na conta do partido por un impagamento da súa franquía pontevedresa, a secretaria xeral, Dolores de Cospedal, contactou con el co obxectivo de atopar unha solución. Indicoulle, segundo expuxo: “Fálao con Ana Pastor, que era deputada por Pontevedra, e a ver se sabía algo e tal. Aquel tema moveuse dalgún modo”. Ao pouco, dixo Páez: “Chamoume o xerente de Pontevedra e díxome que estaba xuntando o diñeiro para devolvelo. Eu díxenlle: Ben, pero a min no me deades o diñeiro, tendes que ingresalo na conta de onde saíu, facer unha transferencia ou o que sexa”. Porén, o xerente dos populares de Pontevedra sinalou que “non, non podemos”. Páez afirmou que os populares de Pontevedra “insistiron en que non tiñan como facelo doutra maneira e aí Bárcenas decatouse”. “Un día eu vin que o xerente de Pontevedra saía do seu despacho e entón díxenlle: Que fas aquí? Logo el puxo un pouco cara de incómodo e dime: Non, que o asunto ese do embargo xa está solucionado. Como que está solucionado? Xa está solucionado e tal. Entón eu, cando me decatei diso, advertín á secretaria xeral do que vira e xa está. Así é todo, Páez sinalou descoñecer o destino que Bárcenas lle deu a esa cantidade e se efectivamente ese diñeiro rematou no peto de Mariano Raxoi e Dolores de Cospedal". Os testemuños de Bárcenas e Páez serán completados nas vindeiras semanas por novas comparecencias. A este respecto, as diversas partes consideran chave as palabras do secretario de organización do PP na Galiza entre 1995 e 2003, Pablo Crespo, que mesmo pode achegar ao longo do procedemento diversa documentación que confirme o sistema de retribución paralela da formación na Galiza. Ademais, Crespo coñece de maneira moi precisa o funcionamento da organización dos populares pontevedreses polas responsabilidades políticas desenvoltas na circunscrición, como presidente da formación en Vilagarcía e polo seu peso específico no Salnés, comarca cun relevo particular para os populares e para a súa estrutura de financiamento. Rafael Louzán, no punto de mira A influencia do Salnés na estrutura de dirección PP chega até hoxe. No momento de realizarse este ingreso na caixa B do PP, a formación en Pontevedra dirixíaa Rafael Louzán, o político de Ribadumia que presidiu a Deputación entre 2003 e 2015. A institución resultou decisiva na recomposición do PP na Galiza após a derrota electoral de 2005, como acreditou o importante número de cadros populares acubillados no ente e o feito de que Louzán fora dos baluartes principais da candidatura de Alberto Núñez Feixoo ao liderado do PP. Segundo fontes consultadas por Nós Diario, Louzán, que chegou á política institucional da man de José Ramón Barral 'Nené', actualmente procesado por contrabando, podería ser chamado a testemuñar en relación con esta doazón dos populares pontevedreses á caixa B do PP. A achega de 50.000 euros de diñeiro presuntamente ilícito por parte do PP de Pontevedra á caixa B do partido afecta de cheo o actual núcleo de dirección dos populares galegos. Á volta de 2010, Feixoo presidía a formación e a Xunta e Alfonso Rueda, máximo responsábel na actualidade do partido en Pontevedra, exercía de secretario xeral da organización e ocupaba posto no Goberno. Ao tempo, o antigo xerente, Cristóbal Páez, apuntou no seu testemuño na Audiencia Nacional a Ana Pastor, cabeza de lista do partido na circunscrición e persoa do círculo íntimo de Mariano Raxoi, como peza chave para conseguir o transvase desa contía, que os dirixentes pontevedreses se negaron nun primeiro momento a facer efectiva. A preocupación sobre a situación na Galiza tense instalado nos diversos niveis de dirección do Partido Popular. Porén, Madrid e Santiago de Compostela discrepan en como afrontar a crise e agardan os termos exactos da declaración de Pablo Crespo, cuxo testemuño ameaza con dar unha volta ao panorama político nacional e estatal. Dáse por feito que o antigo secretario de organización do PP e conselleiro de Portos da Galiza no momento -que dependía organicamente dunha consellaría dirixida por Núñez Feixoo-, ten moi avanzadas as negociacións coa Fiscalía para conseguir beneficios penitenciarios. Segundo diversas fontes consultadas por Nós Diario, o Ministerio Fiscal estaría pedíndolle a Crespo que entregue a documentación que acredita os pagos en diñeiro negro do partido así como os sobresoldos a determinados dirixentes da formación. BNG e PSdeG piden explicacións Os grupos da oposición galega coincidiron hoxe ao exixirlle a Feixoo explicacións sobre as afirmacións nas que o ex tesoureiro Luis Bárcenas relaciona os populares galegos coa caixa B do partido. A líder do BNG, Ana Pontón, considerou que é "evidente" que as declaracións de Bárcenas "volven situar o foco da corrupción nunha ramificación no PP". O do PSdeG, Gonzalo Caballero, puxo de manifesto que "temos que ser implacábeis contra a corrupción, esa é unha máxima que eu teño claro como referente dunha organización política e como cidadán". O portavoz parlamentario do PP, Pedro Puy, retrucoulles onte nunha rolda de prensa: "As explicacións están a darse onde hai que dalas, nos xulgados". O alcalde de Lalín, baixo sospeita As dúbidas sobre a participación do PP pontevedrés na trama de financiamento irregular dos populares non se limita á referida doazón rexistrada na caixa B da formación de 2010. Neste sentido, a xustiza investiga unha serie de ingresos de diversos grupos empresariais non recollidos na contabilidade oficial da organización pero si nun informe elaborado en 2006 polo xerente do PP na Galiza, Modesto Fernández, e cuxa cifra ascende a 1.888.275 euros. A este respecto, un dos instrutores da causa, o xuíz Pablo Ruz, formulou a hipótese de que este diñeiro negro se podería ter empregado na campaña electoral das galegas de 2005, onde o Partido Popular liderado por Manuel Fraga perdeu a maioría absoluta. A campaña dos populares en 2005 estivo dirixida polo actual alcalde de Lalín, José Crespo. O rexedor do Deza foi nomeado coordinador da campaña dos populares en novembro de 2004, após a tentativa de motín dos deputados fieis a José Luis Baltar, a posíbel substitución de Xesús Palmou como secretario xeral e nun contexto de fonda crise na formación, após a caída de Xosé Cuíña. Ao tempo, Crespo deixou a súa pegada na campaña, cun despregue de medios descoñecido até o momento e onde se significaron grandes actos de masas, entre eles un mitin decorrido na última semana de maio de 2005 no Monte do Gozo (Santiago de Compostela), onde afirmaron repartir 30.000 racións de empanada. O acto político do Monte do Gozo aparece sinalado nun documento manuscrito entregado por Bárcenas ao xuíz, Pablo Ruz. Recóllese un apunte escrito coa caligrafía do tesoureiro do PP onde se sinala “Congreso e Monte Dogazo (sic), pagos”, que os xornalistas José Precedo e Xosé Hermida asociaron ao congreso do PP de 2006, onde foi elixido Feixoo, e ao acto político dos populares no Monte do Gozo.