Por que a Xunta apoiou a denuncia de Reganosa contra o Concello de Mugardos para reclamar 5,5 millóns de euros?

A sociedade, participada parcialmente polo Goberno galego, decidiu o pasado ano emprender as "accións precisas" contra a corporación local para exixir a devolución dos tributos abonados na última década que considera que non lle correspondían após unha resolución do TEAC.
Entrada dun buque gaseiro  na ría de Ferrol con destino ás instalacións da planta de Reganosa en Mugardos (Foto: APFSC).
photo_camera Entrada dun buque gaseiro na ría de Ferrol con destino ás instalacións da planta de Reganosa en Mugardos. (Foto: APFSC)

O Consello de Administración de Regasificadora del Noroeste SA (Reganosa), participada nun 25% pola Xunta da Galiza, acordou en xuño de 2021 emprender as "accións precisas para a defensa dos dereitos da sociedade fronte ao Concello [de Mugardos] pola devolución do IAE (Imposto sobre Actividades Económicas) dos exercicios 2010-2019, así como a anulación da liquidación do exercicio 2020, incluíndo a interposición dos recursos contencioso-administrativos que procedan".

Na acta, á que tivo acceso Nós Diario, infórmase do acordo alcanzado, "por unanimidade", para iniciar accións legais contra a corporación municipal, por parte dun Consello de Administración constituído daquela, na parte que representa o Goberno galego, polo actual presidente, Alfonso Rueda; a secretaria xeral de Industria, Paula Uría; o conselleiro de Educación e Cultura, Román Rodríguez; o de Facenda, Miguel Corgos, e o seu predecesor no cargo, Valeriano Martínez, finado o pasado ano.

O asunto volveu saír á palestra nesta quinta feira na comisión de Economía do Parlamento da Galiza, nunha sesión na que Paula Uría instou Mugardos —municipio gobernado polo PP— a ter "altura de miras" e "apoiar o convenio entre o Concello e Reganosa". Pola súa parte, o BNG, da man do deputado Mon Fernández, cuestionou o visto bo da Xunta a esta demanda presentada contra o Goberno local pola que se reclama a devolución de máis de cinco millóns de euros.

"Por que o presidente Rueda votou a favor de que Reganosa demandase o Concello de Mugardos?", preguntou Fernández, unha cuestión que, lamentou, Uría "non foi quen de explicar".

O asunto de fondo é a propia configuración do IAE. Reganosa, cando iniciou a súa actividade, inscribiuse no epígrafe 123.2 deste tributo, mais a Axencia Tributaria modificouno polo 152 posteriormente. A sociedade recorreu mais perdeu en primeira instancia, até que en 2020 o Tribunal Económico-Administrativo Central (TEAC) acabou por darlle a razón, decretando que o epígrafe correcto é o 123.2.

O cambio de epígrafe, subliñou Mon Fernández, é "substancial" para o Concello de Mugardos, pois co 152 recibía da compañía uns 467.000 euros anuais de tributos e, co 123.2, pasaba a 34.183 euros.

Agora Reganosa exixe a devolución do excedente en impostos pagado na última década, unha contía que superaría os 5,5 millóns de euros e, se ben fixo unha oferta á corporación local para negociar o retorno dos cartos, que Uría defendeu na Cámara, o deputado nacionalista cre que se trata dunha "chantaxe".

"A proposta de retirar a demanda consistiría en que o Concello acepte a reclamación de Reganosa, é dicir, a débeda de 5 millóns e medio de euros, e Reganosa faría unha doazón ao Concello por valor de 4.815.312,1€, un 87,5% da cantidade total, e destinar os restantes 683.660,57€ da débeda como pagamento a conta do IAE para os vindeiros 20 anos. Proposta que, por certo, desprende certo cheiro a chantaxe, e gostariamos de saber se considera posíbel que o Concello de Mugardos acepte esta proposta, tendo en conta que en vía administrativa xa rexeitou a devolución dos cartos, e tendo en conta ademais que os informes que solicitou, tanto ao secretario xeral do Concello como outro informe que pediu á Axencia Tributaria, se pronunciaron en contra da solicitude de devolución realizada por Reganosa", apuntou en sede parlamentaria.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios