Por que gaña o PP?

Fixéronse moitas interpretacións interesadas para explicar a maioría absoluta do Partido Popular en Galiza e as súas consecuencias: importante implantación social con organización en todos os concellos. "É o partido que máis se parece a Galiza", "galeguista", con 10.000 apoderados mobilizados, etc. Sobre os aspectos políticos que primaron na campaña insistiuse moito en que o tema da amnistía foi determinante. O PP afirmaba que foi un plebiscito sobre Sánchez e Ayuso explicaba así o resultado: "Feijóo 40, Sánchez 9". Mais houbo outras cuestións, que no son ningunha novidade na actuación do PP, que poden axudar a comprender por que gaña o PP as eleccións do 18-F. A CRTVG ao servizo da campaña do PP Pretenderon diminuír o tempo de cobertura diaria da campaña electoral nos informativos, que foi impedido pola Xunta Electoral Central. 'Defende a Galega' continuou denunciando a manipulación informativa e cualificaba o contido informativo da campaña como o "NO-DO do século XX", que era un noticiario propagandístico do fascismo. Para os sindicatos da TVG a información sobre o debate do 5 de febreiro seguiu de forma "descarada o argumentario do PP" e o Telexornal do día seguinte emitía unha "vil manipulación" do sucedido para "defender sen disimulo" o candidato do PP. Por outra parte, a TVG dedicaba case dous minutos, cousa que non fixeron coas demais candidatas e candidatos, para difundir un vídeo de campaña do PP no que familiares e amigos falaban do lado "máis persoal" de Rueda. Utilización partidista da Xunta Rueda convocaba eleccións para o 18-F e inmediatamente anunciaba en precampaña axudas públicas para distintos sectores e entidades por importe de 450 millóns de euros, que BNG e PSdeG cualificaban como "clientelar, caciquil, electoralista", facendo "uso dos fondos públicos da Xunta ao servizo da estratexia electoral do Partido Popular". A Xunta Electoral obrigaba o PP até en nove ocasións á retirada das campañas da Xunta en redes sociais por "difundir propaganda electoral". Ordenaba retirar o vídeo "Illa de Estabilidade" por relacionar a imaxe do partido coa da Xunta. Isto era o que difundía ese vídeo: "Illa de estabilidade é o destino ideal para o teu voto. Viaxa cara a un futuro cheo de posibilidades. Reserva a túa viaxe para o 18 de febreiro". Esa Xunta Electoral abriu tres expedientes sancionadores contra o presidente Rueda por utilización partidista das institucións. Utilizaba as roldas de prensa posteriores ao Consello da Xunta para facer "electoralismo", non respectando o principio de neutralidade política. A Consellería de Educación enviaba aos correos oficiais dos centros de ensino unha invitación ao profesorado para un acto sectorial de educación "que clausurará o presidente, Alfonso Rueda". Todo o aparato da Xunta estaba ao servizo do PP. A Xunta Electoral obrigou o PP até en nove ocasións á retirada das campañas da Xunta en redes sociais por "difundir propaganda electoral" O Sergas informaba por mensaxe telefónica a traballadoras e traballadores da sanidade, dous días antes das eleccións, das subidas salariais pactadas dez meses antes con sindicatos, que se aplicarían na nómina de febreiro. Manipulacións e mentiras Despois do debate na TVG o PP difundía un argumentario entre os seus cargos para orientar as declaracións e intervencións na campaña electoral, concretando onde había que centrar os ataque ao BNG, con falsidades e mentiras que eran difundidas por moitos medios de comunicación como noticias ou artigos de opinión. O programa electoral do BNG recollía que "é o momento de construír un grande acordo nacional pola lingua galega, que consiga un consenso amplo", "unha formación plurilingüe", "unha oferta educativa completa ou principalmente en lingua galega", como sinala a Carta Europea das Linguas Minoritarias, subscrita en 1992 polo Estado español; mais o PP recuperaba a falsidade da "imposición do galego" e La Voz de Galicia titulaba: "Solo el BNG plantea que en los colegios únicamente se estudie en gallego" (7/2/2024). Ataque directo a Ana Pontón e a un suposto independentismo que non aparecía no programa electoral: "Rueda endurece su discurso contra el 'independentismo con pel de cordeiro'" (La Voz de Galicia, 8/2/2024). "Rueda defiende la 'pluralidade' de Galicia frente a la 'imposición' del nacionalismo" (La Voz de Galicia, 8/2/2024). É público que Pernando Barrena, dirixente de Bildu, non é asesor do BNG, pero había que introducir a ETA na campaña e titulaban: "El PP exige al BNG que cese a un asesor de su eurodeputada condenado por pertenecer a ETA" (La Voz de Galicia, 13/2/2024).Todo isto non condicionou o resultado do 18-F?