O Partido Popular xa deu por feito que conta cos apoios suficientes para se facer coa Presidencia da Federación Española de Municipios e Provincias (FEMP), desbancando así o socialista Abel Caballero desde este mesmo sábado, segundo confirmaron fontes 'populares'.
Será este sábado 23 de setembro cando a FEMP celebre o seu Pleno para elixir o novo Goberno, despois da constitución de todos os Executivos municipais e provinciais e de coñecer a repartición de delegacións que lle corresponde a cada partido, votos que despois decidirán a Presidencia da institución.
Neste contexto, desde o PP xa dan por feito esta cuarta feira que contan cos apoios suficientes, á espera de que a entidade municipalista feche os datos definitivos tras a Comisión de Acreditacións.
En concreto, as eleccións municipais deixaron o PP cuns 14.000 votos aproximadamente no seo da FEMP, polos máis de 10.000 que ten o PSOE, mentres que hai outras formacións políticas cuns 700, 600 ou 500 votos.
E cos 'populares' dando por contado que quedarán coa Presidencia da FEMP, agora falta por coñecer o nome da persoa que ocupará ese posto.
Os posíbeis nomes
Nas últimas datas, a alcaldesa de Zaragoza, Natalia Chueca, postulouse para acabar liderando esta institución municipalista, mentres que a súa homóloga en Santander, Gema Igual, que tamén está nas quinielas, aseguraba que respectará a decisión que se tome desde a dirección do partido.
Para este posto, os partidos adoitan escoller a rexedores con maioría absoluta, para asegurar estabilidade ao cargo e que a Presidencia non estea ao azar de posíbeis mocións de censura.
